Kryeinspektori i IMT-së në Elbasan, Andri Mehja dhe inspektori Bardhyl Qehja, janë shpallur në kërkim nga policia, pasi dyshohet se në bashkëpunim me njëri -tjetrin kanë abuzuar me detyrën duke lejuar ndërtime pa leje dhe njëkohësisht duke mos kryer funksionet e caktuara.
Shpallja në kërkim është bërë pasi gjykata ka caktuar në mungesë ndaj tyre, masën e “arrestit me burg” për dy vepra penale, “Shpërdorimi i detyrës” dhe “Korrupsioni pasiv i personave që ushtrojnë funksione publike”.
Policia në njoftimin e saj thotë se ata dyshohen se në muajin prill 2024, nuk kanë kryer detyrat funksionale për një objekt të ndërtuar pa leje, në lagjen “28 Nëntori”, Elbasan, dhe kanë marrë rryshfet për këtë favorizim.
Njoftimi i policisë
Specialistët e Sektorit për Hetimin e Krimeve Ekonomike dhe Financiare në Drejtorinë Vendore të Policisë Elbasan shpallën në kërkim shtetasit A. M., 38 vjeç, me detyrë kryeinspektor në IMT Elbasan dhe B. Q., 50 vjeç, inspektor në IMT Elbasan.
Për këta dy shtetas, Gjykata e Shkallës së Parë e Juridiksionit të Përgjithshëm Elbasan ka caktuar masën e sigurisë “Arrest në burg”, për veprat penale “Shpërdorimi i detyrës” dhe “Korrupsioni pasiv i personave që ushtrojnë funksione publike”.
Ata dyshohen se në muajin prill 2024, nuk kanë kryer detyrat funksionale për një objekt të ndërtuar pa leje, në lagjen “28 Nëntori”, Elbasan, dhe kanë marrë rryshfet për këtë favorizim.
Materialet procedurale i kaluan Prokurorisë, ndërkohë që vijon puna intensive për kapjen e këtyre 2 shtetasve.
Mësohet se veprimet hetimore janë duke vijuar dhe për zyrtarë të tjerë të kryeinspektoriatit ndërtimor në Elbasan, pasi ka dyshime se janë përfshirë në veprime korruptive dhe “Shpërdorim detyre”.
