Presidenti i Turqisë, Recep Tayyip Erdogan, u bëri thirrje palestinezëve që të bashkohen, në mes të luftës të Izraelit në Gazë.
Këtë deklaratë ai e bëri pasi zhvilloi një takim, që zgjati disa orë, me shefin e Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – Ismail Haniyeh, në Stamboll më 20 prill.
Raportohet se gjatë takimit u diskutua në lidhje me sulmet izraelite në tokat palestineze, veçanërisht në Gaza, çfarë duhet bërë për të siguruar një furnizim të pandërprerë të ndihmës humanitare në Gaza dhe arritjen e një procesi paqeje të drejtë dhe të qëndrueshme në zonë.
Erdogan tha se uniteti i palestinezëve është “vital”, pas takimit që zhvilloi me udhëheqësin politik të Hamasit në Palllatin Dolmabahçe.
“Përgjigja e fuqishme ndaj Izraelit dhe rruga drejt fitores varen nga uniteti dhe integriteti”, tha Erdogan, sipas njoftimit për media.
Presidenti turk tha se “një ditë Izraeli do të paguajë çmimin për shtypjen që u bën palestinezëve”.
Gjatë takimit Erdogan “tha se Turqia vazhdon përpjekjet e saj diplomatike për të tërhequr vëmendjen e komunitetit ndërkombëtar ndaj shtypjes së palestinezëve dhe se në çdo rast nevoja për t’i dhënë fund brutalitetit dhe një armëpushim urgjent nënvizohet e përhershme”.
“Po bëhen të gjitha përpjekjet për të krijuar shtetin e pavarur të Palestinës, i cili është çelësi i paqes rajonale”,-ka theksuar presidenti turk.
