Deputetja e Partisë së Lirisë, Monika Kryemadhi i ka dërguar një mesazh bashkëshortit të saj , njëherësh kryetarit të partisë, Ilir Meta pak orë para mbëledhjes së Komitetit Drejtues Kombëtar të kësaj force politike, që është planifikuar të nisë në orën 18.00.
Teksa Meta ka paralajmëruar se do të miratojë vendimin kundër nepotizmit në parti, duke e përjashtuar bashkëshorten e tij nga postet drejtuese, Kryemadhi shprehet se çdo tentativë imponuese përjashtuese apo edhe bullizuese ndaj kujdo që mendon jashtë rreshtit është devijim ndaj mbylljes jo ringritjes.
Ajo shkruan në një postim në rrjetet sociale se meritokracia, mendimi ndryshe, vlerat e individëve në vite që kanë dhënë ndihmesën, në një parti politike janë jetësore dhe hapja ndaj të resë i bëjnë ato edhe më të domosdoshme për rigjallërimin politik. Sipas Kryemadhit, ndryshimi vjen me fakte jo me fjalë.
Reagimi i plotë:
Meritokracia, mendimi ndryshe, vlerat e individëve në vite që kanë dhënë ndihmesën, në një parti politike janë jetësore dhe hapja ndaj të resë i bëjnë ato edhe më të domosdoshme për rigjallërimin politik. Sot më shumë se kurrë opozita dhe aq më shumë Partia e Lirisë kanë nevojë për to. Çdo tentativë imponuese përjashtuese apo edhe bullizuese ndaj kujdo që mendon jashtë rreshtit është devijim ndaj mbylljes jo ringritjes. Të rinjtë duhet të mësojnë nga gabimet e të vjetërve jo ti përsërisin ato. Ndryshimi vjen me fakte jo me fjalë. E drejta për tu përmisuar ështe për këdo.
Sot në orën 18:00 në KDK e PL.
