Kryetarja e Kuvendit, Lindita Nikolla i është drejtuar me një letër kryetarëve të Grupeve Parlamentare, ku u kërkon që të propozojnë emrat për anëtarë të Komisionit për Dezinformim, të cilët do të miratohen më pas në Kuvend.
Letra i është drejtuar Bledar Çuçit, Kryetar i Grupit Parlamentar të Partisë Socialiste, Gazment Bardhit, Kryetar i Grupit Parlamentar të Partisë Demokratike, Agron Dukës Kryetar i Grupit Parlamentar “Aleanca për Ndryshim” dhe Mesila Dodës Kryetare e Grupit Parlamentar “Demokraci dhe Integrim”.
Ngritja e këtij komisioni është propozuar nga grupi parlamentar i PS-së dhe është miratuar në mënyrë të njëanshme vetëm prej socialistëve në Kuvend.
Komisioni përbëhet nga 11 anëtarë, 6 anëtarë nga grupi i shumicës parlamentare dhe 5 anëtarë nga grupet e pakicës parlamentare dhe do të drejtohet nga përfaqësuesi i socialistëve si shumicë në parlament. Anëtarët e Komisionit do të përcaktohen me vendim Kuvendi.
Komisioni e ushtron veprimtarinë për një afat 1-vjeçar nga data e miratimit të vendimit. Kuvendi mund të vendosë të zgjatë afatin e ushtrimit të veprimtarisë së Komisionit të Posaçëm sipas përcaktimeve në Rregulloren e Kuvendit.
Ky komision ka si synim të nxitë identifikimin e ndërhyrjes së huaj në proceset demokratike përmes një sërë formash, duke përfshirë fushat e dezinformimit nëpërmjet medieve tradicionale dhe atyre sociale për formëzimin e opinionit publik, mbështetjen financiare të drejtpërdrejtë dhe të tërthortë, si dhe ndikimin keqdashës ekonomik të aktorëve publikë dhe minimin e veprimtarisë së shoqërisë civile.
Po ashtu, ka si qëllim dhe kryerjen e një analizë të plotë të të gjithë faktorëve dhe fenomeneve për të vlerësuar nëse janë respektuar detyrimet ligjore në fuqi në lidhje me transparencën në proceset demokratike, veçanërisht transparencën e financimeve në fushata zgjedhore, si dhe transparencën e financimit të të gjithë aktorëve dhe platformave që ofrojnë shërbime në sektorin e informimit publik apo veprimtari të tjera të ngjashme me to.
Ngritja e këtij komisioni të posaçëm parlamentar është konsideruar si i panevojshëm nga ana e opozitës dhe si një ndërhyrje nga Qeveria për në lirinë e medias.
Po ashtu, shqetësim në lidhje me këtë komision ka ngritur dhe rrjeti i gazetarëve “SafeJournalist”, ku i është drejtuar me një letër kryetares së Kuvendit, Lindita Nikollës, lidhur me implikimet më të gjera që kjo nismë mund të ketë në lirinë e medias dhe lirinë e shprehjes.
Qeverisja socialiste ka ndërmarrë një pafundësi nismash negative për lirinë e shprehjes. Deri më tani nuk ka ndonjë gjurmë që të sugjerojë ndonjë fushatë dizinformimi ruse, kineze apo tjetër, në Shqipëri. Vendi ynë ka popullsi kryesisht homogjene, pa ndonjë ndasi të tmerrshme sociale.
