Një person i shpallur në kërkim është arrestuar nga Policia në aeroportin e Rinasit, pas shkëmbimit të informacioneve me blutë e Korçës, teksa po tentonte të hynte në Shqipëri.
Në pranga është vënë shtetasi Fation Fufi, 24 vjeç, banues në Laç, i cili është dënuar me 3 vjet, 10 muaj e 11 ditë burgim, për veprën penale “Ndihma për kalim të paligjshëm të kufijve”, kryer në bashkëpunim.
“Gjykata e Apelit Korçë ka vendosur lënien në fuqi të vendimit të datës 01.02.2021, të Gjykatës së Rrethit Gjyqësor Korçë, e cila e ka dënuar këtë shtetas me 3 vjet, 10 muaj e 11 ditë burgim, për veprën penale “Ndihma për kalim të paligjshëm të kufijve”, kryer në bashkëpunim. Në vitin 2020, ky shtetas në bashkëpunim me dy shtetas të tjerë, kanë transportuar me automjete, kundrejt fitimit, 15 emigrantë nga Vendet e Treta.” – thuhet në njoftimin e Policisë
Materialet procedurale i kaluan Prokurorisë së Korçës.
