Teksa është bërë mbi katër vite që nga tërmeti i nëntorit të vitit 2019, familjet e demtuara vazhdojnë të jenë ende pa banesë, teksa situata e tyre tashmë është bërë edhe më dramatike, pasi shtetit nuk po u jep më as bonus qiraje.
65 familjeve të dëmtuara nga tërmeti u mblodhën këtë të martë në protestë para bashkisë së Durrësit ku kërkonin një zgjidhje ndaj situatës së rëndë social ekonomike që po kalojnë.
Pallati i tyre ndodhet në lagjen 12 të qytetit bregdetar, pranë tregut të vogël industrial dhe është vlerësuar në shkallë të lartë dëmi, DS4 dhe pret rikonstruksionin për ta forcuar. . Sipas bashkisë së Durrësit, ky objekt së bashku me disa të tjerë do të rikonstrukturohet me fonde të saj, po paraprakisht duhet një vendim nga Komisioni Shtetëror i Rindërtimit në mënyrë që të hapen procedurat e tenderit dhe të nisë puna.
Banorët shprehen të zhgënjyer nga institucionet, ku sipas tyre, nuk i janë përmbajtur kontratës dhe vazhdojnë t’i gënjejnë, teksa shprehen se nuk kanë më mundësi për të paguar qiranë.
“Është viti i pestë që kemi dalë nga pallati. Gjysma në pallat jemi pensionistë dhe e kemi kaq të vështirë kur pronari na kërkon qiranë e shtëpisë ku jemi. Bashkia nuk i është përmbajt kontratës me ne, që bonusi ndërpritet kur të futemi në shtëpi. Sipas nënkryetarit, është një ngërç për t’u zgjidh..”
“Po bëjmë 5 vjet që presim. Kryeministri tha deri kur të futeni në shtëpi do të merrni bonus. Ka nëna të vetmuara. Të tjerët punojnë, futen në shtëpia ne rrimë e presim. Kryeministri ka folur vetëm për Tiranën a për të gjithë?!”
“Nuk kemi mundësi për të paguar qiranë. Ka arrit kulmi. Jemi të sëmurë. Ku ti gjejmë lekët. Bonus jo, gjë jo, me çfarë ta mbulojmë qiranë, ose do të futemi brenda e do të vetëflijohemi. Jam kryefamiljare. Një djalë kam.”
“Të na thonë një fjalë. Ndoshta dhe për votime, ama të na e thonë një fjalë që të inkurajojmë veten. Na kanë ikur shpresat fare. Nuk ikim nga këtu pa marrë një përgjigje, përndryshe do të hyjmë të gjithë në pallat. Kemi arrit në një pikë kritike. Jemi me pensione. Me pensionin e burrit 18 000 lekë, se vetë papunë…”, thonë banorët.
