Incidenti ku humbi jetën punonjësja me inicialet K. B., 54 vjeçe ndodhi ditën e djeshme në ambientet e brendshme të kompanisë “Eurolab Internacional Grup” në Fushë Mëzez në kryeqytet.
Siç shpjegon edhe Policia e Tiranës, gjatë sistemimit të disa paletave me pije alkoolike, dy prej tyre janë rrëzuar duke i shkaktuar dëmtime 54-vjeçares, e cila si pasojë e plagëve të marra ka humbur jetën në spital.
Kompania “Eurolab Internacional Grup” ushtron aktivitetin në fushën e shpërndarjes së pijeve alkoolike.
Dyert e kompnaisë janë të mbyllura ditën e sotme, por roja i sigurisë së objektit, në një prononcim për mediat thotë se siguria në punë nuk zbatohet, ndonëse punëtorët janë të pajisur me mjetet mbrojtëse.
“Nuk i di rrethanat, se kam ardh në orën 10 të natës këtu dhe kam gjetur vetëm rojen. Kishte një vit e ca që punonte këtu. Ajo ka qenë pastruese, me të tregu drejt. Siguri për jetesën se ka kërkush njëherë, ta harrosh atë punë. Kanë kasketën e kauçukut, por nuk e përdorin. Këpucët i kanë me maja hekuri në fund” – shprehet roja i kompanisë për MCN.
MCN komunikoi edhe me përfaqësues të kompanisë, të cilët janë të rezervuar për të dhënë një sqarim për situatën, duke sugjeruar që informacionin për ngjarjen ta kërkojmë në Polici.
“Nuk jam i autorizuar të të jap asnjë koment, nëse doni koment shkoni në Polici” – shporehet përfaqësuesi i kompanisë.
Policia e Tiranës ka vënë në pranga 56-vjeçarin Refik Sokol, i cili po drejtonte mjetin e punës pirun, gjatë kohës kur janë rrëzuar paletat, duke shkaktuar vdekjen e sanitares.
