Një shpërndarës i lëndëve narkotike në doza është arrestuar nga Policia e Korçës. Për t’i ikur Policisë ai hodhi nga xhami i automjetit, dozat e kanabisit dhe tentoi të largohej me shpejtësi.
“Automjeti në të cilin lëvizte i mituri është sinjalizuar për të ndaluar, me qëllim kryerjen e kontrolleve. Pavarësisht sinjalit, ka vijuar me shpejtësi lëvizja me automjet dhe 17-vjeçari ka hedhur nga xhami, disa doza cannabisi që kishte me vete, me qëllim shitjen. Shërbimet e Policisë i janë vënë menjëherë në ndjekje dhe kanë mundësuar kapjen dhe ndalimin e tij.” – thuhet në njoftimin e Policisë
Blutë e qytetit juglindor raportojnë se në vijim të veprimeve procedurale, janë kryer kontrolle në banesën e të arrestuarit, ku janë gjetur rreth 1.3 kg lëndë narkotike kanabis sativa që dyshohet se posedohej me qëllim ndarjen dhe shitjen në doza.
Veprimet procedurale me të miturin vijojnë të kryhen në prezencë të prindit, psikologut dhe mbrojtësit ligjor.
Materialet procedurale i kaluan Prokurorisë së Korçës për veprime të mëtejshme.
