Ka nisur protesta e lajmëruar para Bashkisë së Tiranës, ku kërkohet dorëheqja e kryebashkiakut Erion Veliaj pas aferës “5D”, ku disa prej drejtorëve të kësaj Bashkie kishin përfituar miliona euro tendera nga kjo bashki apo institucione vartëse të saj me kompaninë e tyre “5D Konstruksion”, që sipas SPAK, pronarët “de facto” të saj ishin Mariglen Qato dhe Redi Molla.
Në protestë janë dhe shumë eksponentë të opozitës si Flamur Noka, Gazment Bardhi, Belind Këlliçi dhr deputetë të tjerë, po ashtu e pranishme është edhe vajza e liderit demokrat Sali Berisha, Argita Malltezi.
Eksponentët e PD-së kanë deklaruar se janë aty si protestues, pasi protesta është organizuar sipas tyre nga vetë qytetarët.
Që prej mbrëmjes së djeshme, nga frika e trazirave, Erion Veliaj “blindoi” fasadën e jashtme të Bashkisë së Tiranës dhe instaloi një numër të lartë kamerash, teksa ka dhe një numër të lartë efektivësh policie.
Proterstuesit po brohorasin në kor “hajdut, hajdut”, teksa kanë gjuajtur edhe me mollë edhe vezë.
Kujtojmë se në lidhje me dosjen “5D” SPAK ka arrestuar tre prej drejtorëve të Bashkisë së Tiranës, Taulant Tusha, Redi Molla dhe Mariglen Qato, si dhe ka vënë nën hetim disa zyrtarë të tjerë të bashkisë.
“Nga burimet e provave të mbledhura në kuadër të hetimeve të këtij procedimi penal janë krijuar dyshime të arsyeshme se shtetasit Redi Molla dhe Mariglen Qato janë ortakët e vërtetë dhe pronarët “de facto” të shoqërisë “5D Konstruksion” sh.p.k. Shtetasit Redi Molla dhe Mariglen Qato e kanë zotëruar këtë shoqëri tregtare në mënyrë indirekte, duke përdorur persona të tjerë, shtetasit Eduard Meta, Muhamet Petriti dhe Nestor Muhametllari, si ortakë fiktiv në aktet e rregjistrimit dhe funksionimit të shoqërisë, me të cilët ortakët e vërtetë të shoqërisë kanë pasur lidhje shoqërore dhe lidhje miqësore. Nga veprimet hetimore të kryera është provuar fakti se shoqëria tregtare “V.A.S Konstruksion” sh.p.k e njëjtë me “5D Konstruksion” sh.p.k, ka marrë pjesë dhe është shpallur fituese në kundërshtim me rregullat e prokurimit publik, në disa procedura prokurimi të organizuara nga autoriteti kontraktor Bashkia Tiranë.” – thuhej në njoftimin e SPAK.
