Sekretari i Përgjithshëm i PD-së, Flamur Noka, duke folur nga foltorja e Kuvendit, ka akuzuar drejtpërdrejt se 45-vjeçari i paidentifikuar tek laboratori i kokainës në Xibrakë është Olsi Rama, vëllai i kryeministrit Edi Rama.
Noka tha se dosja u arkivua me prova të gjalla, me urdhër politik, ndërsa i drejtohet kryeministrit Edi Rama duke i thënë se edhe i vëllai ka ngrënë kumbulla e dardha pas shpinës së tij. Ai theksoi se dy prokurorët e çështjes u ngjitën në detyrë.
Gjatë një replike me deputetin socialist Pandekli Majko, Noka deklaroi se edhe për të SPAK ka mbyllur një dosje, pasi sipas tij, ai del në përgjimet e Kukësit duke folur për 300 mijë euro.
“Shqipëria është një narkoshtet që zë fill nga kryeministri. Si mund të mos vijë kryeministri të japë shpjegime kur vëllai i tij është i kapur me zë dhe figurë. Me urdhër politik rezulton se të gjithë personat e Xibrakës ishin të identifikuar vetëm njëri i moshës 45 vjeç me flokë të shkurta, nuk ishte identifikuar. Kur policia sheh që në një grup është një i paidentifikuar. Pika e parë ta kërkojnë në sistem fotografinë e personit, e dyta ta kërkojë. Të gjithë u evidentuan, vetëm njëri jo. I them zotërisë kryeministër, por kur Policia e Shtetit thotë se një nuk është i identifikuar është që ta kërkojë në sistem fotografinë e personit dhe pika e dytë është ta shoqërojnë. Mos vallë ishte ky një deputet me imunitet. Kush ishte? Po jua them unë. Po ua them unë; personi nga grupet e vëzhgimit është identifikuar, por kur është parë se kush është, është dhënë urdhri politik dhe personi i pa identifikuar që përdorte automjetin është vëllai i kryeministrit. Këtë se thotë as Gazment Bardhi as Flamur Noka. Këtë e thonë të dhënat zyrtare të nxjerra nga TIMSI. Personi që drejtonte makinën më 13 janar 2015 ishte Olsi Rama, personi që e drejtonte i gjithë grupi, ishte Olsi Rama. Ky nuk identifikohej dot. Kjo tregon asgjë më shumë që ju si qeveri jeni organiziatë kriminale, funksioni si e tillë. Tani kryeministri, i kapur në çark, nuk denjon të vijë të japë llogari, të përgjigjet.
Mirë ne që paskërkëshim ngrënë molla dardha kumbulla pas shpinës së kryeministrit, por edhe vëllai pas shpine po t’i haka kumbullat dhe dardhat more zotëri. A mban dikush përgjegjësi për këtë? Po për këtë dosja që është arkivuar edhe me prova të gjalla, ato dy prokurorë a duhet të mbajnë përgjegjësi? Apo lart e ma lart Si shpjegohet që dy prokurorët e çështjes që njëri shkoi në krye të Prokurorisë së Përgjithshme dhe tjetri do shkonte drejtues i SPAK. Atë ditë ndërhyri dikush më i fuqishëm se Rama dhe ndikoi që të mos zgjidhej. Ky është realiteti. Nuk ndodh dot në asnjë vend një situatë e tillë dhe tani kryeministri i kapur në çark nuk denjon të vijë këtu të japë llogari.
Ta kuptoj hallin Pandi. Përgjimet e Kukësi ku dole ti, 300 mijë euro atje 300 këtu ta ka mbyllur dosjen SPAK-u. Një ditë do të hapet ajo dosje për ty, Ramën dhe të gjithë organizatën kriminale”, tha Noka.
Majko replikoi me ironi, ku tha se nuk e përgënjeshtron sot sepse është i papërsëritshëm, në lidhje me akuzat se SPAK i ka përgjuar telefonin.
“Dëgjova me vëmendje numrin dy të fraksionit kryesor të PD-së duke përsëritur që SPAK është një organizatë kriminale dhe pastaj vazhdoi duke thënë që edhe ty Majko SPAK për një bisedë telefonike të regjistruar me 300 mijë dollarë etj etj , euro më fal, e bëjmë edhe 3 mln nuk ka problem. Kjo organizatë kriminale më ka mbyllur dosjen, dmth unë miqësisht edhe si koleg, se na solli koha në këtë sallë, si mendoni ju se zgjidhet drejtësia. Prokurori i Përgjithshëm sipas fjalëve të numrit 2 të PD në shumicë, thotë që ka shitur dosjen e vëllait të kryeministrit ndaj është vërë Prokuror i Përgjithshëm. Jeni thjesht një grup anti-sistem. Ca doni këtu ju? Si e keni mor miqtë e mi? Flamur, unë nuk të përgënjeshtroj se je i papërgënjeshtrueshëm. Je i papërsëritshëm në ato që thua Të përgënjeshtrosh ty është më shumë se një humbje kohe. Por unë e kam me kolegët e mi që janë njerëz të nderuar, të cilët ti del aty dhe thua SPAK është një organizatë kriminale, dilni me këtë gjuhë. Supozoheni se jeni shpresa e shqiptarëve për ndryshim në Shqipëri. Ku doni ta çoni këtë karrocë që e quani e djathta shqiptare?!”, tha Majko.