Eksperti ligjor dhe anëtari i Kryesisë së Partisë Demokratike Ivi Kaso, ka komentuar shtyrjen e seancës për kërkesën e kreut të grupit parlamentar të Partisë Demokratike Gazment Bardhi, për çregjistrimin e Lulzim Bashës si kryetar i PD-së.
I ftuar në Ora News, Kaso theksoi se sot parashikohej që Gjykata e Tiranës duhej të bënte një veprim administrativ që duhej ta kishte bërë që para 1 viti.
Kaso: “Pra është ajo që ndan dhe “fatin” e Partisë Demokratike për sa i përket organeve drejtuese të saj, por edhe për sa i përket legjitimitetit të partisë.
Kjo çështje sot parashikonte që Gjykata e Tiranës duhej të bënte një veprim administrativ që duhej ta kishte bërë që para 1 viti. Pra, atëherë kur Lulzim Basha vetëdeklaroi se ishte dorëhequr nga drejtimi i PD-së dhe këtë fakt juridik ta pasqyronte në vendimet e gjykatës.
Dhe në këtë kuadër, mund të themi që Gjykata e Tiranës mban një rekord të dyfishtë paligjshmërie, pra vendimin e gjyqtarit Zhukri të cilin duhej ta regjistronte pranë Gjykatës së Tiranës dhe t’i jepte fuqi ligjore organeve të reja të PD-së por edhe simboleve të saj, ajo refuzoi në mënyrë të paprecedentë që ta bënte këtë”, theksoi ndër të tjera Ivi Kaso.
Vendimi për kërkesën e çregjistrimit të Bashës u mor nga Këshilli Kombëtar, në korrik të vitit të kaluar.
Vendimi i Këshillit Kombëtar të Partisë Demokratike
Një grup deputetësh janë ngarkuar të ndjekin të gjitha hapat ligjor dhe statutor për zbatimin e vendimit të Këshillit, si dhe për përfaqësimin e Partisë Demokratike, në rrugë ligjore për të kundërshtuar çdo akt që bie ndesh me vendimin. Gjithashtu, Këshilli Kombëtar i PD, si organi më i lart drejtues i Partisë, i ka autorizuar deputetët që në emër të Partisë Demokratike të Shqipërisë të kërkojnë çregjistrimin e ish-Kryetarit të dorëhequr të PD Lulzim Basha nga regjistri i partive politike.”
