Është shtyrë seanca gjyqësore për liderin e opozitës Sali Berisha, për revokimin e masës së sigurisë ‘arrest shtëpie’.
Avokatët e Berishës, Sokol Mëngjesi dhe Genc Gjokutaj janë paraqitur në ambientet e GJKKO, por seanca u shty më 8 prill, në orën 13:00.
Shkak i shtyrjes, është bërë mungesa e prokuroreve. Përmes një shkrese, dy prokuroret e SPAK, vunë në dijeni gjykatën se nuk mund të paraqiteshin në seancë për arsye objektive.
Kujtojmë se Berisha ka bërë disa herë kërkesë për ndryshim të masës së sigurisë, por ajo është refuzuar. Po ashtu ai ka kërkuar që të jetë i pranishëm në seancat plenare, si e drejtë e tij për të përfaqësuar interesin e qytetarëve që e kanë zgjedhur, në Kuvend. Pavarësisht pretendimeve të tij, GJKKO ka refuzuar kërkesat.
Kujtojmë se Berisha ndodhet në arrest shtëpiak që prej 30 dhjetorit të vitit të kaluar.
