Burime për media bëjnë me dije se ditën e enjte do të konstituohet në sallën e Komisionit Parlamentar të Ligjeve grupi i dialogut për ligjet që kërkojnë shumicë të cilësuar votash (3/5) dhe ligjet e nevojshme për rrugëtimin në Bashkimin Europian.
Bëhet fjalë për të ashtuquajturin nënkomisioni për “Reformat”, i cili ishte pjesë e marrëveshjes mes mazhorancës dhe opozitës për rikthimin e normalitetit në Kuvend. Mekanizmi i dialogut do të ketë tre anëtarë nga opozita dhe tre nga mazhoranca.
Më herët, kreu i grupit parlamentar të PD-së, Gazment Bardhi ka njoftuar se anëtarë të opozitës do të jenë Oerd Bylykbashi i PD-së dhe Erisa Xhixho e Partisë së Lirisë, ndërsa një vend bosh e la për grupin e Lulzim Bashës, por që u refuzua nga ky i fundit. Nuk dihet se kush do ta zërë vendin e lënë bosh nga Basha.
Ndërkohë, mazhoranca ende nuk i ka publikuar emrat e anëtarëve të saj, por burime për mediat bëjnë me dije se dy prej tyre pritet të jenë Damian Gjiknuri dhe Klotilda Bushka.
Ky grup pritet të marrë vendime me konsensus për ligjet që duan 84 vota, përfshirë reformën zgjedhore, për të shkuar drejt votimit në parlament, me dakordësinë e palëve.
