Nga Boldnews.al
Greku i mirë, apo greku i keq? Thjesht janë “kokë turku” të Ramës….. “Greku i mirë” për grekërit e Athinës zyrtare, Fredi Beleri është në burg padrejtësisht sipas tyre, ndërsa “grekut të keq” Jorgo Goro, mirë ja bënë që e futën në burg, po sipas Athinës zyrtare… Qesharakja dhe absurdi nuk kanë fund sepse “greku i keq” Jorgo Goro u denoncua nga “greku i mirë” Fredi Beleri teksa ky i fundit ishte në burg, e tashmë të dy janë në qeli, jo se këto janë punë drejtësie, por fare thjesht: “çështje mirëfilli hajnie”. Goro i tha burgut hapu për “shqiptarët safi”, çiftin Olta Xhaçka dhe Artan Gaçi. Himara tashmë është edhe pa kryetarin e zgjedhur Beleri, por edhe pa kryetarin në detyrë, Goro. Andej nga Athina heshtën zyrtarisht kur Goro i Ramës por edhe i “tyri” dikur, sot ka veshur uniformën sportive të burgut ku mbahet me hatër se gjithsesi “ka qenë i madh” dhe e ka lyer mirë qerren e korrupsionit qeveritar që ha pa ndalur, copëton bregdet e hedh beton mbytës në emër të investimeve strategjike.
Të tillë ishin edhe “strategjikët” Xhaçka-Agaçi, “patriotë të mëdhenj” që duheshin shpërblyer nga Sulltani me saraje buzë detit. Dy të vetëquajturit “grekër” janë bërë kurban të Ramës për të vënë në skenë një teatër që as në Akropolin historik s’ka ndodhur ndonjëherë. Po çfarë po luhet në Himarë? Më shumë se gjysma e saj është tjetërsuar nga oligarkë e ku pjesë e kësaj kasaphane mjedisore janë bërë edhe “grekërit e mirë” që në emër të interesit bërtasin se janë të tillë për të mbajtur një dorë me “evro greku” e një tjetër me “lekë shqiptari”. Aty në Athinën zyrtare hiç s’po e kuptojnë këtë Ramën tonë, që është “i Zoti” i pasurive publike këtu në vendin tonë. I dhuron, i dhunon, i shet, i fal për hir të një qëllimi: pushtet dhe vetëm pushtet!
Mbase me arrestimin e Goros do e kuptojnë qartësisht se Rama nuk është vetëm kryeministër i një Republike Parlamentare në letra, por Ali e Kadi i drejtësisë së re, ku vetë “grekërit zyrtarë” investuan si pjesë e BE-së, pa e kuptuar hiç se mishin e freskët ja varën në qafë ujkut Alfa që prin kopenë e lugunive pushtetarë. A kanë zë këta politikanët e acaruar për Belerin tashmë që ish-LSI-sti Vangjel Tavo (edhe ky me dyert e hapura në zyrat e Athinës), shkoi në tavën e pshtetit?
Ai mori postin e Prefektit të Qarkut Vlorë me synimin e qartë se tashmë që Goro e Beleri u emëruan nga maja e pushtetit si burgaxhi e ka udhën e hapur për të kandiduar në siglën e PS si kryebashkiak i Himarës. Me një “gurë SPAK-u” Rama vrau tre zogj… Absurd është qëndrimi i Athinës zyrtare që vijon të mendojë se në Himarë e gjetkë ku “shpikin grekër” nuk është çështje etnie por hajdutërie. Ata kanë të kurruptuarit e tyre, ne kemi tonët, që i ofrojnë publikut mishin e kalbur të kinse patriotizmit deri kur strategjikët e pushtetit të kenë gllabëruar çdo buzë deti.
