Kryeministri Edi Rama tha se “jemi absolutisht të kënaqur” me propozimin e kompanisë së dhëndrit të Donald Trump për ishullin e Sazanit.
“Ne nuk zgjedhim persona, ne në bazë të legjislacionit shqiptar i referohemi ofertave dhe propozimeve që na bëhen. Transformimi i Sazanit në një xhevahir të kurorës së artë të turizmit mesdhetar është një ambicie e kahershme, për hir të së vërtetës e kanë pasur dhe paardhës të mitë, ka qenë komplet e paimagjinueshme që të afroheshin investitorë seriozë në Shqipëri. Sot Shqipëria është bërë një adresë gjithmonë e më e kërkuar jo vetëm nga turistët, por edhe investitorët dhe ne jemi të kënaqur që kemi një propozim”, tha Rama pas një mbledhjeje me drejtuesit e qarqeve në selinë e PS, duke iu përgjigjur interesit të gazetarëve.
Ai u shpreh se kompania e interesuar ka bërë një aplikim në AIDA dhe shtoi se projekti do të shqyrtohet nëse “përputhet me ekuilibrin e zhvillimit dhe atë të mbrojtjes së natyrës”.
Më tej e quajti projektin “një ofertë fantastike me një potencial të jashtëzakonshëm”.
Akuzave se një pronë e shqiptarëve po dhurohet, Rama iu përgjigj se të gjitha vendet kanë ligje favorizuese për zhvillimin e turizmit. I pyetur për detajet e kontratës, nëse do të falen taksat dhe toka (siç në fakt ka ndodhur me investimet strategjike) Rama u përgjigj me arrogancë.
“Latinët kanë një shprehje: injoranca nuk është argument. Sa i përket zhvillimeve të sipërmarrjes së bazuar të investimet e huaja, të gjitha vendet në planet kanë legjislacione favorizuese, dhe sa i përket zhvillimeve në sektorin e turizmit, është një garë e egër se kush i ka më favorizuese kushtet që të tërheqë investtitorë të mëdhenj. Këtu nuk bëhet fjalë për të falur asgjë të shqiptarëve, përkundrazi. Ne sot jemi në kushtet kur shqiptarët janë pjesë e investimit në Portin e Durrësit sepse aty s’është bërë asnjë falje sepse porti mbetet i shqiptarëve”, tha ai.
Amnistia penale
Amnistia penale ishte një tjetër çështje të cilën e preku gjatë deklaratës. Kryeministri u pyet se me cilin grup të PD-së do të votohet kjo nismë dhe Rama u shpreh se do ta votojnë të gjithë.
“Amnistia është në tryezën e kuvendit dhe do ta votojnë të gjithë, pasi nuk kanë ku shkojnë. Do të votojnë për një akt që është pa ndarje partiake dhe siç bëjnë vendet e civilizuar, krijon mundësi që shteti të ushtrojë detyrimin kushtetues për lehtësimin e barrës së dënimit për ata që e meritojnë”, tha Rama.
