Apeli i Gjykatës së Posaçme shtyu shqyrtimin e kërkesës së ish-kryeministrit Sali Berisha për ta lejuar të marrë pjesë në seancat plenare të Kuvendit. Seanca gjyqësore e radhës u caktua të zhvillohet më 25 mars, në orën 9:00.
Në një prononcim për gazetarët në dalje të gjykatës, avokati i Berishës Genc Gjokutaj tha për gazetarët tha se shkak për shtyrjen e seancës ishte mungesa e prokurorëve.
Ai hodhi dyshime se akuza kishte nevojë të koordinohej me kryeministrin Edi Rama para seancës.
“Prokurorët kishin dorëzuar një shkresë në të cilën thuhej se për arsye profesionale, ata nuk mund të ishin prezent. Sigurisht ky është një sebep, një justifikim, ata janë dy prokurorë, të paktën njëri prej tyre duhet të ishte prezent. Nuk e kuptoj termin arsye profesionale, sepse profesioni i prokurorit është në hetim dhe gjykim. Nuk i di arsyet e tjera, por sigurisht me angazhimin e zotit Rama në punët e tjera, kontakti është shkëputur dhe caktuan një datë tjetër derisa të rivendoset SPAK në kontakt me zotin Rama”, tha Gjokutaj.
Kërkesa e Berishës është rrëzuar më herët në shkallën e parë.
Berisha ndodhet në “arrest shtëpie” i akuzuar për korrupsion në çështjen e privatizimit të ish-kompleksit Partizani. Akuzë që e ka cilësuar të paqenë dhe ka deklaruar se procesi ndaj tij është politik, i dirigjuar nga kundërshtari i tij politik, kryeministrit Edi Rama.
