Arlind Qorri ka reaguar pas raportimeve se dhëndri i Donald Trump ka paraqitur te autoritetet shqiptare projekte për të investuar në zonën e mbrojtur të ishullit të Sazanit dhe Zvërnec.
Kreu i Lëvizja Bashkë, duke iu referuar një artikulli të “New York Times” për rastin, nxjerr në pah gjashtë pika, që sipas tij, mund të kujtohen nga raportimi.
Ai thumbon dhe përfaqësues të Partisë Demokratike, teksa kujton se lidhur me zhvillimin, s’kanë bërë asnjë reagim.
“1. Dhëndri i Donald Trump-it kërkon të përvetësojë ishullin e Sazanit dhe Zvërnecin për të ndërtuar komplekse turistike. 2. Nënkontraktori i tij pritet të jetë Shefqet Kastrati, i cili ndërkohë ka blerë një shtëpi afër rezidencës së Trump-it dhe një hotel në SHBA, duke nxjerrë nga Shqipëria 62.5 milionë euro. 3. Qeveria shqiptare nuk ka bërë publike asnjë procedurë të ndonjë konkursi a tenderi ndërkombëtar për koncesionimin e Sazanit e Zvërnecit. 4. Gjasat janë që sidomos në rast të zgjedhjes së Trump-it president dhe me ndikimin që oligarku Kastrati ka mbi Edi Ramën, këto projekte do të shkojnë përpara pa e çarë shumë kokën për rregullat e konkurrencës, përfitimet e shtetit apo impaktin mjedisor. 5. “Revolucionarët” në dritare dhe poshtë dritares kthejnë kokën nga ana tjetër pa guxuar të bëjnë as gëk, as mëk. 6. Ne si popull, edhe në këtë rast, do të mbetemi me gisht në gojë”, shkruan Arlind Qorri në një postim në rrjetet sociale.
