Vllaznia do të udhëtojë në transfertë për të sfiduar Kukësin, takim që do të luhet ditën e nesërme në “Kukës Arena” në orën 14:00.
Një duel mjaft interesant mes dy ekipeve që luftojnë për objektiva të kundërt.
Shkodranët tentojnë fitoren për të vazhduar serinë e rezultatev pozitive, teksa në kampionat janë skuadra më e mirë e sezonit.
Qatip Osmani ka folur për këtë përballje, i cili është shprehur se pavarësisht se verilindorët ndodhen në vendin e fundit, objektivi i Vllaznisë mbetet i njëjtë me të gjitha ekipet.
“Çdo ndeshje për ne është e rëndësishme. Është e vërtetë që Kukësi është në luftë për mbijetesë, por nuk duhet të ndikohemi nga ky fakt, pasi në ndeshjet e fundit Kukësi ka treguar cilësi, ka fituar kundër ekipeve kualitative, kështu që ne jemi përgatitur për një kundërshtar serioz dhe jemi të gatshëm për të dhënë maksimumin në këtë ndeshje.
Sigurisht që presim lojë të vështirë, pasi vetvetiu lufta për mbijetesë bën të vetën. Nëse marrim parasysh edhe ndeshjet e mëparshme, Kukësi nuk ka qenë indiferent ndaj kundërshtarëve”, ka theksuar timonieri i shkodranëve.
