Gjykata e Posaçme rrëzoi këtë të martë kërkesën e kryedemokratit Sali Berisha dhe Jamarbër Malltezit për të hequr masën e sigurisë “arrest në shtëpi” për ta.
Avokati i tyre, Genc Gjokutaj, në një deklaratë për gazetarët pas përfundimit të seancës, tha se vendimi është tërësisht politik. Sipas tij, si prokuroria që kundërshtoi heqjen e masës, ashtu edhe gjykata që nuk e aprovoi, janë nën urdhrat e kryeministrit Edi Rama.
I pyetur nga media nëse ka dijeni se kur do të përfundojnë hetimet, Gjokutaj tha se “as prokurorët se dinë, se është fjala e Ramës, ai është personi që do vendosë”.
Avokati u shpreh se në seancën e sotme prokuroria duhet të shpjegonte akuzën, por ai shtoi se nuk iu përgjigj asnjë prej pyetjeve të mbrojtjes. “Prokurori tha s’ju jam shpjegim asnjë pyetje tuaja’”, theksoi Gjokutaj.
Ai dënoi dhe qëndrimin e gjykatës, duke u shprehur se si organ vendimmarrës, nuk i bëri asnjë pyetje prokurorisë dhe pranoi akte që sipas tij, tregojnë se procesi është fiktiv.
“Këta janë një komisariat politik që thonë mbajeni në këtë gjendje… kjo s’është më gjykatë”, theksoi Gjokutaj.
Duke komentuar rrëzimin e kërkesës për përjashtimin e gjyqtares Irena Gjoka nga çështja, Gjokutaj u shpreh: “Atë kërkesë do ja qepim në pallto gjykatës”.
Pas seancës së të premtes së javës së kaluar, avokati konfirmoi depozitimin e një ekspertize financiare që sipas tij, rrëzon akuzat e SPAK për pastrim parash dhe korrupsion ndaj Malltezit. I pyetur se ç’qëndrim mbajti SPAK për dokumentin në seancë, avokati tha: “Prokurorët s’përgjigjen për aktet e tyre, lëre pastaj aktin tonë”.
Berisha dhe Malltezi akuzohen nga Prokuroria e Posaçme për vepra penale të korrupsionit në lidhje me privatizimin e ish-klubit sportiv “Partizani”. Ndaj Malltezit, rëndon edhe akuza e pastrimit të parave. Akuza që janë cilësuar të paqena si nga Berisha ashtu dhe dhëndri i tij Malltezi. Të dy janë shprehur se procesi ndaj tyre është tërësisht politik, i orkestruar nga kryeministri Edi Rama, kundërshtari politik i kreut të Partisë Demokratike Sali Berisha.
