Policia e Fierit ka raportuar se ka arrestuar edhe një tjetër adoleshent në lidhje me vrasjen e djeshme të 19-vjeçarit, Grei Bihucit.
Në pranga është vënë shtetasi Klajdi Muka, 17 vjeç, banues në fshatin Kallm i Madh të Fierit. Sipas autoriteteve, 17-vjeçari ka bashkëpunuar me autorin Florjan Muka, 18 vjeç për vrasjen e Grei Bihuci dhe plagosjen e Olti Serjanajt.
“Nga veprimet hetimore dyshohet se këta 2 shtetas, në bashkëpunim me njëri-tjetrin, pas një konflikti për motive të dobëta, kanë vrarë me mjet prerës (thikë), shtetasin G. B., 19 vjeç, dhe kanë plagosur shtetasin O. S., 20 vjeç, i cili është në spital, jashtë rrezikut për jetën. Në cilësinë e provës materiale janë sekuestruar një mjet prerës (thikë) dhe një përforcues grushti, të cilat janë gjetur në vendin e ngjarjes.” – thuhet në njoftimin e Policisë.
Ngjarja ka ndodhur paraditen e djeshme rreth orës 11:30, në bulevardin “Jakov Xoxa” të Fierit. Konflikti mes të rinjve thuhet në media se ka nisur për shkak të opsionit “like” ndaj një vajze në rrjetet sociale, të cilët e njihnin të dy djemtë e rinj.
19-vjeçari pasdite punonte kamerier në një prej lokaleve në afërsi të qendrës së qytetit dhe njihej si djalë i mirë dhe i sjellshëm.
