22-vjeçari Amarildo Meta, djali i vogël i familjes Meta, nuk ka preferuar të japë shpjegime tek oficerët e policisë në lidhje me gjurmët e gishtërinjve të gjetura në qytën e pistoletës dhe qeses plastike që ishte mbështjellë arma me te cilën u vra babai i tij Pëllumb Meta.
I arrestuar si bashkëpunëtor në krim bashkë me të vëllain Hysenin dhe të motrën Hygertë, Amarildo Meta vijon t’u qëndrojë deklarimeve fillestare duke pohuar se nuk ndodhej në shtepi në momentin e krimit. Ai ka deklaruar se nuk e ka prekur pistoletën, por se vetëm ka ndihmuar vëllanë, Hysen Metën për të fshehur makinën.
“Unë nuk kam lidhje me vrasjen e babait. Nuk ndodhesha në shtëpi në momentin e krimit, isha në punë te servisi. Aty ka edhe kamera sigurie dhe ju e keni verifikuar këtë fakt. Kur kam shkuar në shtëpi kishte ndodhur ngjarja. Nuk kam asnjë ide se si kanë përfunduar gjurmët e gishtërinjve të mi në pistoletë. Une s’e kam prekur fare pistoleten as para dhe as pas ngjarjes. Nuk di çfarë të them. Unë kam ndihmuar vëllnë vetëm për të fshehur makinën. Me armën s’kam lidhje fare”, ka deklaruar Amarildo Meta gjatë marrjes në pyetje pas rezultatit të analizave që dolen nga laboratori i kriminalistikës.
Ndërkohë, autoritetet çuan në një poligon për qitje, të tre fëmijët bashkë me bashkëshorten e viktimës, Blerinën, për të vërtetuar nëse dinin të përdornin armën, por vetëm vajza 19-vjeçare Hygerta Meta e kreu eksperimentin, pasi familjarët e tjerë refuzuan. Ajo kreu disa qitje radhazi, duke vërtetuar se dinte ta përdorte armën.
Dy djemtë e arrestuar dhe bashkëshortja e viktimës refuzuan të qëllojnë duke u thënë hetuesve se nuk dinë të përdorin armë dhe se nuk kanë provuar të bëjnë qitje ndonjëherë. Refuzimi i ka thelluar dyshimet tek grupi hetimor se vrasjen e 50-vjeçarit mund ta ketë kryer njëri nga djemtë dhe se autorësia po kërkohet t’i lihet vajzës, me shpresën se ajo mund të dënohet më pak.
