Një 23-vjeçar nga Divjaka është arrestuar këtë të hënë nga Policia pasi akuzohet për dhunë në familje.
Policia sqaron se në pranga ka rënë shtetasi me iniciale, P.B pasi ka dhunuar motrën e tij.
“Specialistët për Hetimin e Krimeve të Komisariatit të Policisë Divjakë arrestuan në flagrancë shtetasin P. B., 23 vjeç, banues në fshatin Çermë, pasi dyshohet se ka ushtruar dhunë ndaj motrës së tij”,- thuhet në njoftimin e Policisë.
Gjithashtu ka nisur procedimi për një 51-vjeçar në Lushnje, pasi është konfliktuar me një 63-vjeçar dhe djalin e këtij të fundit për arsye pronësie.
“Në vijim të informacionit të dhënë më datë 09.03.2024, për një konflikt për motive pronësie, ndërmjet tre shtetasve, informojmë se specialistët për Hetimin e Krimeve të Komisariatit të Policisë Lushnjë, në vijim të veprimeve procedurale për këtë rast, referuan materialet shtesë në Prokurori, për shtetasin E. K., 51 vjeç, pasi nga veprimet hetimore dyshohet se me vetëgjyqësi ka tentuar të mbyllë portën e rrethimit të tokës në pronësi të 63-vjeçarit me të cilin është konfliktuar, si dhe ka shtyrë me forcë djalin e këtij shtetasi”,- njofton Policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
