Pas asaj në Babicë të Vlorës, një tjetër bazë armatimi që dyshohet se furnizonte grup kriminale, është zbuluar në Durrës.
Hekuran Troplini dhe Emiljano Pasho janë arrestuar, konfirmoi policia këtë të shtunë, duke shtuar se janë sekuestruar armë zjarri dhe municione.
Aksioni
Operacioni i koduar “Hills” erdhi pas një hetimi disa mujor me metoda proaktive nën drejtimin e prokurorisë së rrethit, të iniciuar fillimisht nga blutë e qytetit bregdetar.
Burime zyrtare nga policia bënë me dije se në Shkallnur u arrestuan Hekuran Troplini, 20 vjeç dhe Emiljano Pasho, 19 vjeç, të dy banues në këtë fshat. Ata akuzohen për veprat penale “Trafikimi i armëve dhe municionit”, kryer në bashkëpunim dhe “Prodhimi dhe shitja e narkotikëve”. Sipas të njëjtave burime, të dy u arrestuan në flagrancë duke shitur armë zjarri luftarake kallashnikovë.
Nga hetimet, dyshohet se të rinjtë, në bashkëpunim me persona të tjerë, kanë shitur gjatë muajve të fundit sasi armatimi dhe municioni luftarak. Blutë thonë se hetimet kanë siguruar prova ligjore “mbi veprimtarinë kriminale të mbajtjes së një sasie armatimi, me qëllim furnizimin e grupeve kriminale”.
Në cilësinë e provës materiale janë sekuestruar 4 armë zjarri kallashnikovë me 20 krehra, qindra fishekë luftarak, 1 motomjet që sipas hetuesve shërbente për të lëvizur dhe transportuar armët e municionin, me qëllim shitjen, 63 700 lekë dhe një sasi lënde narkotike e dyshuar kanabis.
Në një video të publikuar, policia shpërndan pamje nga aksioni, ku dallohet të jetë përdorur dhe dron, si dhe pamje të armëve e municioneve të sekuestruara.
https://www.youtube.com/watch?v=HK9yKQ66Kxs&feature=youtu.be
Hetimet për rastin vijojnë për të zbuluar persona të tjerë të përfshirë në aktivitetin e jashtëligjshëm.
