Një 86-vjeçare humbi jetën paraditen e kësaj të hëne në fshatin Shkopet pasi ra nga ura teksa ishte duke kaluar mbi të.
Për këtë ngjarje banorët e fshatit fajësojnë institucionet shtetërore. Ata shprehen se shteti që prej vitit 2010 nuk ka ndërhyrë për t’ua rregulluar urën.
Në një prononcim për Balkanweb, ata rrëfejnë se më 3 dhjetor të 2010, ura e fshatit Shkopet u rrëmbye nga ujërat e lumit Mat pas hapjes së digës së hidrocentralit, por edhe pse kanë kaluar më shumë se 13 vite, asnjë institucion shtetëror apo vendor nuk ndërhyri.
Duke qenë se nuk u rregullua as nga Bashkia Kurbin e as nga shteti, banorët e kishin rindërtuar urën vetë, por mungonte siguria në të. Frrok Pergjoka thotë se faji është i shtetit për humbjen e jetës së të moshuarës.
86-vjeçarja Dava Gjegji dyshohet se duke kaluar mbi urë ka rënë aksidentalisht prej saj. Fatkeqësisht e moshuara nuk mundi të dalë nga uji, duke humbur jetën.
