Vrasja e 49-vjeçarit Pëllumb Meta në fshatin Shënavlash të Durrësit, vijon të jetë nën hetim nga autoritetet ndërsa detaje të reja dalin në dritë.
Lidhur me ngjarjen janë dënuar me burg 3 fëmijët e viktimës, Hysen, Hygerta dhe Amarildo Meta të cilët akuzohen se vranë babanë e tyre dhe e groposën në kasollen e bagëtive.
Sakaq vajza e madhe e familjes së Pëllumb Metës, ka folur këtë të premte para autoriteteve lidhur me rastin.
Bedra Meta, e martuar, ka qëndruar me një linjë me deklaratat e pjesëtareve të familjes së saj lidhur me sherret e herëpashershme në familjen e tyre. Që në krye të herës ajo ka deklaruar se nuk ka ditur asgjë për vrasjen e babait nga vëllezërit dhe motra e saj dhe e ka marrë vesh këtë kur ngjarja është bërë publike.
Por ajo ka deklaruar gjithashtu se babai i tyre ka qenë njeri autoritar dhe kërkonte që çdo gjë në familje të bëhej siç thoshte ai. Ajo po qëndron te shtëpia e gjyshërve të saj ku gjendet dhe e ëma, në Gjorm të Laçit.
Burime nga grupi hetimor bëjnë të ditur se përveç intervistave të kryera deri tani, ku janë dokumentuar ato të familjarëve të viktimës (dy djemve, dy vajzave, bashkëshortes dhe 3 pjesëtareve të familjes Qatja që kërkonin të bënin shkesi me Metët) do të kryhen edhe disa veprime të tjera praktike për ta plotësuar dosjen hetimore.
