Me përleshje të ashpra me policinë në qendër të Athinës e përkujtuan grekët, përvjetorin e parë të tragjedisë hekurudhorë në afërsi të Selanikut.
Ajo e 28 Shkurtit, ku humbën jetën 57 persona dhe u plagosën 85 nga përplasja e një treni udhëtarësh me një tjetër mallrash, konsiderohet si më e rënda në historinë e vendit. Mes viktimave, ishin dhe gjashtë shqiptarë: Klaudia Lato, Ifigjenia Micka, Erieta Molko, Ioanis Xhiollas, Denis Ruçi, Pavlin Bozo. Protestuesit mendojnë se e drejta nuk është vënë ende në vend pas kësaj tragjedie.
Manifestimit iu bashkuan dhjetëra mijëra njerëz në Athinë. Ndërsa, punonjësit e hekurudhave janë në grevë 24-orëshe që ka paralizuar qarkullimin e trenave në gjithëve.
Ata kërkojnë rritje pagash dhe investime në sistemin hekurudhor që edhe pas tragjedisë së vitit të kaluar vazhdon të jetë po aq e mbingarkuar dhe e keqmenaxhuar.
Homazhe u bënë gjatë ditës edhe në vendin e tragjedisë, ku familjarë të viktimave, shumica nxënës të një shkolle të mesme vendosën kurora me lule dhe morën pjesë në ceremonitë fetare në nderim të tyre.
Mes atyre që iu bashkuan protestuesve që kërkuan drejtësi për viktimat është edhe nëna e shqiptares Klaudia Lata.
20-vjeçarja ishte studente ekselente në Fakultetin e Mjekësisë dhe kishte lindur dhe ishte rritur në Larisa. “Vajza ime bleu një biletë vdekjeje”, rrëfeu e përlotur Alma Lata, nëna e 20-vjeçares për mediat e shtetit fqinj.
Ajo kërkon përgjegjësit e tragjedisë të gjykohen dhe nëse shpallen fajtorë të shkojnë pas hekurave. Historia e Klaudias mori vëmendjen e mediave të shtetit fqinj për shkak të dinamikës. Klaudia shkoi për tre ditë në Patra dhe hipi në tren për t’u kthyer në shkollën e saj. Prindërit, të cilët jetojnë në një fshat të Larisës, i kërkuan ta takonin, por për fat të keq ajo nuk ndaloi tek ta pasi donte të arrinte sa më shpejt në Selanik për të studiuar.
