Teksa presidenti i Ukrainës Volodymyr Zelensky pritet të vijë në Shqipëri për samitin “Ukrainë – Europa Juglindore”, kryeministri Edi Rama ka folur rreth pritshëmrive të tij për këtë takim. Në një intervistë për “Euronews Albania”, Rama tha se ideja për të organizuar samitin lindi pas një bashkëbisedimi me presidentin ukrainas dhe duke qenë se edhe ftesat i kishin dërguar së bashku, ky mund të quhet një samit i të dy vendeve.
I pyetur nëse do t’i kërkojë njohjen e Kosovës nga Ukraina, Rama nuk dha një përgjigje të drejtpërdrejtë.
“Dëgjoni, gjëja më e fisme që Kosova po bën është se po tregohet besnike ndaj vlerave të saj. Kjo e nderon Kosovën dhe nuk bëhet për të përfituar diçka. Kosova po bën gjënë e duhur, fillimisht për veten e saj, sa i takon besnikërisë ndaj vlerave të saj. Sigurisht, rruga drejt njohjes nga Ukraina është e gjatë, por është pozitive që Kosova do jetë pjesëmarrëse. Presidentja Osmani ju përgjigj shumë shpejt ftesës dhe do të jemi të gjithë së bashku aty. Pavarësisht mosmarrëveshjeve, çështjeve të ndërlikuara mes vetes, të gjithë do të jenë aty me Ukrainën, për diçka që na lidh të gjithëve, në mënyra të ndryshme” – tha Rama.
