Tirana vijon të zhgënjejë teksa sot barazoi 1-1 me Laçin në “Elbasan Arena”.
Takimi filloi me malore për kurbinasit, të cilët mbetën me një lojtar më pak që nga minuta e 18-të.
Paulo Silva u ndëshkua me karton të kuq nga arbitri, pas një ndërhyerje ndaj Lushkja-s.
Në të 34-tën, Abazaj lëshoi sinjale në portën kundërshtare, me anë të një goditje të bukur, por pa mundur dot të dërgojë topin në rrjetë.
Në superioritet numerik, bardheblutë u hodhën në sulm në pjesën e dytë, për të gjetur golin e avantazhit.
Në të 54-tën minutë, të besuarit e Erbim Fagut festuan pas golit të Lushkja-s.
Laçi nuk u dorëzua dhe ia doli të vendosë ekuilibrat 10 minuta përpara fundit të kohës së rregullt, me 18-vjeçarin Myrta, i cili përfitoi pas një gabimi amatoresk të mbrojtjes bardheblu.
Kështu Tirana ngjitet sërish në vendin e katërt duke përfituar nga humbja e Dinamos ndaj Vllaznisë (0-1), me 35 pikë, po aq sa dhe blutë.
Nga ana tjetër Laçi ndodhet mes mbijetesës dhe “Final 4” me 30 pikë të grumbulluara në vendin e 7-të.
