Gjykata e Tiranës vendosi këtë të premte të lirojë katër personat e arrestuar gjatë protestës së opozitës.
Kindi Toli, 21 vjeç; Andrea Malia, 18 vjeç; Bledar Kola, 37 vjeç; dhe Ismet Stefanis, 33 vjeç u lanë nën masën e sigurisë detyrim paraqitje.
Ata akuzohen për shkatërrim prone, goditje për shkak të detyrës dhe përdorim të lëndëve piroteknike.
Të arrestuarit “ushtruan veprime të dhunshme gjatë protestës së ditës së djeshme, duke hedhur lëndë piroteknike (kapsolla, flakadanë, molotov), në drejtim të punonjësve të Policisë dhe të një institucioni shtetëror (kryeministria)”, njoftoi policia dy ditë më parë.
Pas vendimit, kreu i grupit parlamentar të PD-së Gazment Bardhi tha se të arrestuarit janë dhunuar nga tre efektivë policore. Dy prej tyre i kanë dhunuar gjatë shoqërimit, ndërsa i treti në komisarin e policisë, tha ai për gazetarët.
Për këtë, deklaroi se është bërë kallëzim në autoritetet përkatëse.
“Paralajmëroj se dhuna ndaj jashtë asaj që lejon ligji është akt personal dhe ka pasoja personale. Çdo punonjës policie duhet të respektojë ligjin, të drejtat e njeriut dhe nuk mund të ushtrojë dot dhunë nën autoritetin e uniformës. Të gjithë janë identifikuar dhe do të mbajnë përgjegjësi për aktet e tyre. Përshëndes gjykatën për vendimin, askush nuk ka shkelur ligjin. Kishin dalë për të protestuar dhe nuk kishte arsye pse të merreshin peng për 3 ditë. Por kur policia drejtohet nga shërbëtore të krimit mund të presësh gjithçka. Dhuna është ushtruar gjatë shoqërimit dhe në komisariat. Janë 3 punonjës policie përgjegjës për këto akte. Dy protestues kanë shenja në fytyrë, të tjerët kanë fraktura në trup për shkak të dhunës me urdhër politik. Kemi bërë një ankesë në AMP dhe kallëzim penal”, tha Bardhi.
