Teksa në kampionat është shkëputur në +9 pikë nga ndjekësi më i afërt, duket se Interi po tregon të njëjtën fytyrë edhe në Champions League duke shfaqur lojë dominuese dhe në fund duke e konkretizuar me fitore.
Zikaltrit kanë marrë një sukses shumë të rëndësishëm në aktin e parë të 1/16-ve të Championsit pasi mundi 1-0 Atletico Madrid në Milano.
Në pjesën e parë, skuadrat u treguan të kujdesshme, teksa ekzistonte frika e pësimit të golit. Në minutën e 13-të, zikaltërit reklamuan një penallti për shkak të një prekje me dorë në zonë, por arbitri Kovacs nuk kishte të njëjtin mendim.
Në minutën e 37-të, Lautaro provoi me kokë, por Oblak i tha jo. Në të 43-tën shfaqet Thuram, sulmuesi francez nuk bëri dot diferencën para porte. Në fillimin e pjesës së dytë, Arnautovic shpërdoroi një rast të artë, me Inzaghin në pankinë që nuk po e mbante vendi.
Gjithsesi, do të ishte pikërisht Arnautovic që do shënonte në portën e Oblak në minutën e 80-të, duke ndezur kështu festën zikaltër në tribuna. Kualifikimi mbetet i hapur dhe llogaritë mbyllën në sfidën e kthimit.
Sfida tjetër mes PSV dhe Dortmund është mbyllur në barazimin 1-1. Të parët që shënuan ishin gjermanët, ku në minutën e 24’ gjetën golin me Malen.
Goli i barazimit për “tulipanët” erdhi në minutën e 56’, me Luuk de Jong i cili nuk gaboi nga pika e bardhë e penalltisë.
