Një 57-vjeçar është shpallur në kërkim nga policia e Lezhës, pasi akuzohet se ka djegur me benzinë dy automjete dhe një lokal.
Blutë bëjnë me dije se autori është identifikuar si Ernest Çuni. Për arsye ende të paqarta ai u ka vënë flakën dy makinave dhe lokalit në pronësi të një 62-vjeçari.
Ngjarja ka ndodhur pak pas mesnate, në fshatin Kalivaç. Policia ka nisur hetimet për zbardhjen e plotë të rastit dhe për lokalizimin e kapjen e autorit.
Njoftimi i policisë:
Pas njoftimit se rreth orës 00:15, në fshatin Kalivaç, Lezhë, ishin djegur me lëndë djegëse (benzinë), lokali dhe 2 automjete të parkuara në afërsi të lokalit, në pronësi të shtetasit P. Gj., 62 vjeç, specialistët për Hetimin e Krimeve të Komisariatit të Policisë Lezhë kanë organizuar menjëherë punën për të identifikuar autorin/ët dhe për të zbardhur rrethanat e rastit.
Si rezultat i veprimeve të shpejta hetimore dhe procedurale të kryera në vendin e ngjarjes, brenda pak orësh, u bë i mundur identifikimi i autorit të dyshuar të rastit, shtetasit E. C., 57 vjeç, banues në Lezhë.
Vijon intensivisht puna për kapjen e 57-vjeçarit, për identifikimin dhe arrestimin e shtetasve të tjerë që mund të jenë përfshirë në këtë rast, si dhe për dokumentimin me prova ligjore të rrethanave.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme.
