Sali Berisha u ndal te sulmet që lëshoi të enjten Edi Rama ndaj Albin Kurtit, gjatë konferencës së përbashkët nga kryeministria, me Antony Blinken.
“Edhe dje në praninë e sekretarit Blinken, për këtë bufator të shpifur të Beogradit nuk ishte Serbia problemi i rajonit, por ishin shqiptarët, ishte Kosova. O tradhtar, 20 shkurti po vjen, shqiptarët do të japin ty, atë që meriton”, tha kryedemokrati gjatë fjalës së mbajtur nga protesta poshtë banesës së tij.
Berisha, i cili e nisi deklaratën pas mbajtjes së një minute heshtje në nder të opozitarit rus Alexei Navalny, i bëri apel qytetarëve ti bashkohen protestës së 20 shkurtit, e thirrur nga opozita.
“Në rast se duam këtë komb, duam fëmijët tanë, duam veten tonë, dua të ndalemi dhe të mendojmë se Shqipërinë e bëjnë shqiptarët dhe vetëm shqiptarët, se drejtësinë e bëjnë shqiptarët dhe vetëm shqiptarët. Se demokracinë në Shqipëri, e ndërtojnë shqiptarët dhe vetëm shqiptarët. Ndaj dhe të besojmë tek njëri-tjetri. ADN-ja shqiptare, idealet e lirisë së shqiptarëve, por mbi të gjitha dinjiteti i qytetarëve shqiptarë, dhe me 20 shkurt të mblidhemi sepse 20 shkurti është fundi i tiranëve, është dita në të cilën shqiptarët përmbysin tiraninë. Le ta bëjmë 20 shkurtin ditën e dinjitetit tonë, ditën e guximit tonë, ditën e trimërisë tonë, ditën e idealeve tona, ditë e demokracisë, ditën e shpresës për Shqipërinë dhe shqiptarët”, apeloi Berisha.
