Jose Mourinho ka bërë një deklaratë të papritur e cila ka shkaktuar debat mes tifozëve.
Tekniku i njohur portugez deklaron se një sfidë mes Juventusit dhe Interit prodhon më shumë emocione dhe rivalitet se vetë derbi i qytetit mes Milanit dhe zikaltërve duke injoruar kështu kuqezinjtë.
Derbi Inter-Milan? “Është si një miqësore. Juventus – Inter është rivaliteti i vërtetë në Itali. Kur drejtova Interin, luaja kundër Juventusit dhe menjëherë ndjeva se ka diçka të ndërlikuar historikisht mes dy skuadrave. Kjo është ajo që ju e quani një rivalitet të vërtetë.”
Ndërkohë gjatë intervistës së fundit, me Rio Ferdinand, Mourinho është rikthyer të flasë edhe për vitin e “tripletës” me Interin, dhe pikërisht për gjysmëfinalen e kthimit ndaj Barcelonës, ku asokohe trajneri portugez u kritikua jo pak për tërheqjen e skuadrës në mbrojtje për minuta të tëra, dhe tanimë duket se portugezi ka vendosur të shpjegojë edhe arsyet e atij vendimi.
“Ndeshjen e parë e trajtova me dëshirën për ta fituar dhe ia dolëm të triumfojmë 3-1. Në “Camp Nou” thonë se parkuam autobusin, por harrojnë se ne luajtëm me 10 lojtarë që prej minutës së 28’ dhe kishim përballë skuadrën më të mirë të kohës, me lojtarë si Messi, Xavi, Iniesta, Busquets, Pique, Ibrahimoviç, etj.
Kur ke për të arritur një objektiv mund të përdorësh çdo strategji të mundshme dhe kjo quhet inteligjencë taktike. Nuk jam penduar për atë vendim, pasi bëmë një ndeshje të madhe dhe në fund arritëm finalen. Nuk më interesonte aspak se çfarë do të thoshin komentatorët e specialistët e studiove”,– është shprehur “Special One”.
