Një person është arrestuar dhe një tjetër është proceduar penalisht në gjendje të lirë, për shkak të moshës, pasi akuzohen për disa grabitje në dy muajt e fundit në qytetin bregdetar.
Në pranga është vënë shtetasi Renato Meta, 28 vjeç, si dhe janë referuar materialet në Prokurori, ku nisi procedimi në gjendje të lirë për një shtetas 17 vjeç, të dy banues në Durrës. Ata akuzohen si të implikuar në 5 vjedhje apo tentativa vjedhjeje, gjatë 2 muajve në qytetin bregdetar.
Më konkretisht këta dy shtetas, dyshohet se duke bashkëpunuar me njëri-tjetrin:
-më datë 14.02.2024, kanë tentuar të vjedhin në banesën e shtetasit A. M., në lagjen nr. 14;
-më datë 11.02.2024, kanë tentuar të vjedhin pajisje, në një magazinë në pronësi të shtetasit R. B., në lagjen nr. 14;
-më datë 30.01.2024, kanë vjedhur një laptop, në banesën e shtetases P. G., në lagjen nr. 13;
-më datë 26.01.2024, kanë tentuar të vjedhin në banesën e shtetases M. T., në lagjen nr. 13;
-më datë 13.01.2024, kanë vjedhur pajisje, në banesën e shtetases M. Xh., në lagjen nr. 13.
Policia njofton se vijon puna për zbardhjen e vjedhjeve të tjera që mund të kenë kryer këta shtetas.
Materialet procedurale i kaluan Prokurorisë pranë Gjykatës së Durrësit për veprime të mëtejshme, për veprën penale “Vjedhja”, kryer në bashkëpunim dhe më shumë se një herë.
