Anëtari i kryesisë së Partisë Demokratike, Belind Këlliçi, ka folur sërish këtë të mërkurë për çështjen e inceneratorëve. Ai ka sjellë edhe njëherë në vëmendje deklaratat e ish-numrit dy të qeverisë, Arben Ahmetaj, i cili u shpreh se pronari faktik i inceneratorit të Tiranës është kryebashkiaku Erion Veliaj.
I ftuar në SYRI TV, Këlliçi u shpreh se nga selia e PD-së tani do të publikohen dokumente të cilat tregojnë se ku kanë shkuar paratë e inceneratorit të Tiranës.
Këlliçi: ‘Tashmë që ne kemi prej 6 muajsh pa pushim dhe faktojmë çdo ditë që pronari faktik është Erion Veliaj, e konfirmuar edhe nga goja e ish-numri Arben Ahmetaj, kjo çështje është ezauruar.
Erion Veliaj është pronari faktik, me bekimin e Edi Ramës.
Tani çështja kryesore është se ku janë paratë. Ne do të gjurmojmë paratë.
Deri tani kemi depozituar qindra faqe dokumente që faktojnë se ku kanë shkuar, transferuar paratë.
Në ditët në vijim do të publikojmë detaje të tjera në lidhje me biznesin e dherave.
Kemi goxha dokumente, SPAK të vazhdojë të bëjë punën e tyre, ne tonën. Na shtohen dhe rrugës dokumente të tjera.
Për ti shpëtuar burgut, shesin të gjithë njëri-tjetrin.
Materialet, dokumentet që marrim, pasi lexohen dhe administrohen, e verifikohen nga një grup ekspertësh që merren me këtë çështje, ne i bëjmë publike.
A ka prona të blera nëpër kullat e Tiranës nga pronarët dhe prestanomet e inceneratorit të Tiranës.
A ka kontrata të cilat janë lidhur me klering nga ITS e famshme, e cila merrte para po nga vetja e saj. Klodian Zoto merrte para nga Mirel Mërtiri për të blerë prona.
A ka prona të tjera, apo llogari ofshore në ishujt Kajman, Seychell, apo në vende të tjera.
Paratë janë të rëndësishme.
SPAK le të rrijë përgjumur, ne do të bëjmë punën tonë’, u shpreh Këlliçi.
