Gjykata e Apelit të Juridiksionit të Përgjithshëm ka lënë këtë të mërkurë në burg mjekun kardiolog Dervish Hasi.
Hasi akuzohet për “trafikim të të miturve” dhe “pornografi”.
Një ditë më parë, i përfaqësuar nga avokati i tij, Hasi kërkoi kërkoi zbutje të masës së sigurisë, “arrest në burg”, vendim që ishte marrë në Gjykatën e Shkallës së Parë, por kjo kërkesë është rrëzuar nga Apeli.
Në seancë, avokati i mjekut ka deklaruar se për sa kohe nuk ka ligj që ndalon disa martesa, nuk ka vepër penale. “Kur të dalë ligji mund të kishte diskutim. Video që pretendohet nuk është publikuar askund”, është shprehur mbrojtësi ligjor i Hasit.
Dervish Hasi akuzohet se ka abuzuar seksualisht me një 16-vjeçare, për një periudhë 2-vjeçare. Ai ka deklaruar se është besimtar dhe kishte edhe tre partnere të tjera.
Paraprakisht dyshohet se ai e ka manipuluar me terma besimi, duke i premtuar se do te bëhej gruaja e tij e katërt.
42-vjeçari, Dervish Hasi ushtronte profesionin e mjekut kardiokirurg në spitalin universitar “Shefqet Ndroqi” prej vitit 2021.
