Sekretariati i Etikës në Kuvendin e Shqipërisë ka vendosur përjashtimin me 10 ditë të 18 deputetëve të PD-së nga seancat plenare dhe me 20 ditë të deputetit Ervin Salianji.
Ky vendim vjen pas kërkesës së firmosur nga 7 deputetë socialistë, të cilët i konsideron 19 deputetë e PD-së si përgjegjës për tensionet e shkaktuara në seancën e fundit plenare dhe tek komisioni i Reformës Zgjedhore.
Me 10 ditë nga aktivitetet parlamentare janë përjashtouar deputetët: Albana Vokshi, Sorina Koti, Elda Hoti, Lindita Metaliaj, Isuf Cela, Tritan Shehu, Lefter Geshtenja, Helidon Bushati, Xhelal Mziu, Edmond Spaho, Oerd Bylykhashi, Saimir Korreshi, Kasem Mahmutaj, Ramadan Likaj, Kastriot Piroli, Qani Xhafa, Lodovik Hasani, dhe Luan Baçi.
Në kërkesën e mazhorancës theksohej se deputeti Ervin Salianji mbante një zhurmues në dorë në seancën e fundit në Kuvend, duke moslejuar normalitetin në sallë, ndërsa deputetët e tjerë bllokuan foltoren dhe shkaktuan zhurmë në sallë. Sa i përket komisionit të Reformës Zgjedhore thuhej se deputetet Albana Vokshi dhe Lindita Metaliaj kanë zënë vendet e bashkëkryetarëve si dhe u janë drejtuar me tone të larta deputetëve socialistë.
Mesa duket, me këtë vendim mazhoranca e lë Kuvendin pa opozitë, pasi vlen të theksohet fakti se seancën e fundit në Kuvend munguan dhe deputetët Flamur Noka dhe Gazment Bardhi të përjashtuar me nga 10 ditë, si dhe deputetët Bledion Nallbati dhe Asllan Dogjani të përjashtuar me nga 5 ditë.
Seancat në Kuvend, mbyllen për pak minuta, teksa mazhoranca voton çdo ligj pa diskutijme, por vetëm me ngritje kartonash. Opozita prej rreth 3 muaj ka ndërmarrë aksionin për të bllokuar të gjitha aktivitetet parlamentare, deri në plotësimin e kërkesave të tyre, të cilat i konsiderojnë si kushtetuese, për ngritjen e komisioneve hetimore dhe ndryshimin e anëtarëve të opozitës në komisionin e posaçëm të reformës zgjedhore.
KËRKESA E PS PËR “ETIKËN”
