Ish-ministri i Financave, Arben Malaj, është shprehur se Shqipëria nuk ka kulturë shtetformuese.
Komentet Malaj i bëri në emisionin “Barometri” në Euronews Albania, ku tha se diplomacia serbe i cilëson shqiptarët si tufa barinjsh që nuk duhet të bashkohen, sepse nëse bashkohen, bëhen më të mëdhenj dhe më të dëmshëm.
Ai nxori në pah edhe disa nga problemet gjatë qeverisjes socialiste në Shqipëri, që sipas tij, janë korrupsioni dhe kapja e shtetit.
“Unë besoj te pjesa e programit, PS është e konturuar si një parti e majtë progresive. Problemi kryesor që ka PS është qëndrimi ndaj administratës publike si pasuri kombëtare. Nuk kemi arritur të krijojmë një administratë të paprekshme. Rotacionet politike e dobësojnë. Ne nuk kemi një kulturë të mirë shtetformuese.
Kjo është në thelb të diplomaciosë serbe ky koncept. Ata na akuzojnë dhe thonë për ne ‘ata janë tufa barinjsh, mos i lejoni të bashkohen se po u bashkuan do bëhen më të mëdhenj dhe më të dëmshëm’.
PS duhet të kishte rezultate më të mira te qeverisja. Korrupsioni dhe deri te kapja e shtetit janë sëmundje gërryese. Çfarëdo programi të kesh ti, nëse nuk krijon një sistem mbrojtës nga këto, atëherë të na rrojë sistemi. Taksa progresive është në themel të një partie të majtë”, tha Malaj.
