Pas dështimit të zhvillimit të seancës me prezencë fizike të deputetëve në komisionin për reformën zgjedhore, mbledhja është zhvilluar online.
Në të kanë marrë pjesë deputetët e mazhorancës bashkë me ata të grupit “Alibeaj”.
Bashkëkryetari i komisionit nga radhët e PS, Damian Gjiknuri, dënoi aksionin protestë të opozitës për bllokimin e punimeve të komisionit. Një qëndrim të ngjashëm mbajti edhe në një deklaratë për mediat nga kryesia e Kuvendit pas përfundimit të mbledhjes online. “Ne kërkojmë që mbledhjet të zhvillohen normalisht, por do të punojmë patjetër edhe në rrugë të tjera siç është ajo online”, shtoi Gjiknuri.
PD, nga ana tjetër, kërkon zëvendësimin e bashkryetarit të komisionit Enkelejd Alibeajt nga grupi Basha me Oerd Bylykbashin, me argumentin se ai nuk përfaqëson Partinë Demokratike.
Ndërsa Enkelejd Alibeaj duket se nuk e ka ndërmend lëshimin e karriges, duke pretenduar se ai “përfaqëson PD-në”.
Gjatë mbledhjes së sotme online, ai tha se prezenca virtuale këtë të premte vjen për të “çuar përpara” punimet e komisionit.
“Dua të them diçka lidhur me pjesëmarrjen tonë. I qëndrojmë gjithmonë qëndrimit sipas rregullores që mbledhjet e komisioneve, do duhet të zhvillohen fizikisht. Ai është parlamenti jo i një grupi, disa deputetëve, jo i PS, por e të gjithë deputetëve që kanë të drejtë të shprehin mendimit, mbi të gjitha është parlamenti i shqiptarëve. Midis kësaj konsiderate dhe tjetrës që unë bie dakord, se ka një interes për ecjen para të Komisionit, prevalon ky i dyti. Prandaj bashkë me kolegët përfaqësues të PD marrim pjesë edhe në zhvillimin e kësaj mbledhje të radhës, të komisionit. Prandaj sot jemi prezent, unë Çollaku, Tase dhe Jakupllari”, deklaroi Alibeaj.
Gjatë mbledhjes online, u miratua me shumicë votash kalendari i punimeve të komisionit.
