Kreu i SPAK, Altin Dumani u shpreh këtë të enjte se puna e prokurorëve po jep rezultate.
Në një takim me studentë në universitetin “Luigj Gurakuqi” në Shkodër, Dumani pretendoi se SPAK po i jep fund pandëshkueshmërisë dhe po shkon përtej emrave apo pushtetit që kanë pasur disa individë.
“Kemi kapacitet për t’u përballur me grupet e strukturuara kriminale, kemi dhëne prova. Ne çdo ditë hetojmë, marrim persona në hetim. Ne po tentojmë të thyejmë mitin e pandëshkueshmërisë . Është e lodhshme, e vështirë, por ne po bëjmë pavarësisht emrit apo pushtetit që kanë pasur individët. Ne SPAK kemi ndryshuar filozofinë e kërkimit të provës me metoda speciale. Kemi përdorur të ardhurat nga pasuritë e konfiskuar dhe kemi investuar në teknologji”, tha Dumani.
Sipas tij, “SPAK është një institucion krejtësisht i pavarur dhe këtë pavarësi e gëzon me fuqinë që i jep Kushtetuta”.
Megjithatë, ai shtoi se pavarësia lidhet me integritetin e çdo prokurori apo gjykatësi.
“Për të qenë të suksesshëm në luftën kundër korrupsionit duket legjislacion i mirë dhe struktura të specializuara dhe këto struktura. Ne kemi pavarësi totale të garantuar nga Kushtetuta. Nuk kemi marrëdhënie varësie me pushtetet e tjera. Mirëpo, gjithçka varet nga integriteti i secilit prokuror dhe gjykatës, mund të jesh i pavarur, por zgjedh të flirtosh me pushtetin”, tha Dumani.
