Një 29-vjeçar është arrestuar nga policia, ndërsa një tjetër është shpallur në kërkim nën akuzën se mashtronin qytetarë nëpërmjet një llogarie në Instagram, për automjete me qera.
“Specialistët për Hetimin e Krimeve të Komisariatit të Policisë Malësi e Madhe, menjëherë pasi një gazetar i emisionit Piranjat ka kallëzuar se nëpërmjet një llogarie në Instagram, që reklamonte automjete me qira, mashtroheshin qytetarë, kanë organizuar punën për të nxjerrë përpara përgjegjësisë penale autorin/ët. Nga veprimet hetimore dhe procedurale është identifikuar dhe arrestuar shtetasi Orest Kurtaj, 29 vjeç, si dhe është shpallur në kërkim kushëriri i tij, shtetasi Arsid Kurtaj, 29 vjeç, të dy banues në Koplik”, njoftoi policia.
“Këta shtetas iu merrnin para qytetarëve, pasi i mashtronin se do t’iu jepnin me qera, automjete që kishin reklamuar në faqen e tyre në Instagram. Sapo merrnin paratë, shtetasit ndërpritnin komunikimin me klientët, pa ofruar shërbimin për të cilin ishin paguar“, shtuan të njëjtat burime.
Ndaj dy personave rëndon akuza për veprën penale “Mashtrimi”.
