Ish-kryeministri Sali Berisha, në fjalimin e sotëm mbajtur për mbështetësit e tij nga ballkoni i banesës ku ndodhet në arrest shtëpie, kujtoi Heroin Kombëtar, Gjergj Kastriot Skënderbeun, në përvjetorin e vdekjes së tij.
Ai tha se Skënderbeu luftoi kundër një pushtuesi të huaj, ndërsa qytetarët që marrin pjesë në aksionin e opozitës, por luftojmë me një pushtim të brendshëm, më barbar se çdo pushtim tjetër.
Ish-kryeministri shtoi, se Rama përdori të gjithë mjetet për të asgjësuar opozitën, por dështoi sepse sot rruga e “Shpresës” është rruga e parlamentit të lirë të shqiptarëve.
Pjesë nga fjalimi i Berishës:
Skënderbeu, i doli zot Shqipërisë dhe kombit, në një kohë kur Rajoni dhe Europa dridhej para perandorisë automane.
Ku shqiptar, atdhetar, princ i lirisë, besoi tek shqiptarët, besoi tek trimëria dhe guximi i tyre, dhe bëri beteja për 25 vite me radhë, të cilat bënë historinë e kohës dhe jehuan në katër anët e planetit dhe Skënderbeu mori përjetësinë.
Ajo kohë, ishte kohë perandorisë, por Skënderbeu mbetet për çdo shqiptar, frymëzim, engjëlli që ruan Shqipërinë dhe shqiptarët në çdo kohë.
Skënderbeu, i vetëm, por u ngrit dhe mundi një perandori, forca e vërtetë e tij qëndronte në të vërtetat që mbronte, në idealet që luftoi, ndaj dhe për ne ajo është dhe mbetet frymëzuesi i çdo shqiptari që beson të vërtetën, që është i vendosur të sakrifikojë për të.
Ju jeni të pathyeshëm, sepse ju po mbroni të vërtetat e mëdha të kombit. Skënderbeu luftoi një pushtim të huaj, kurse ju po luftoni një pushtim të brendshëm, më barbar se çdo pushtim tjetër që kanë njohur shqiptarët.
Po luftoni një pushtim të brendshëm, si pushteti i një kryehajduti, që në 8 vite varfëroi dhe mjeroi vendin duke vjedhur shqiptarët në mënyrë të pamëshirshme dhe duke u pasuruar vetë me miliarda me qeveritarë, e familjarët e tij.
