Politologu Ilir Kalemaj e konsideroi Presidentin Bajram Begaj si më të dobëtin në të gjithë historinë e pluralizmit në Shqipëri.
Duke folur në MCN Live, Kalemaj theksoi se në një situatë krize kreu i shtetit duhet të ishte një zë unifikues dhe pajtues mbi palët, ndërkohë që Begaj është një zë që nuk dëgjohet.
“Ishte parashikuar që seanca të niste me fjalën e Presidentit të Republikës që s’mundi ta mbante në Parlament, por e mbajti në Presidencë, gjë që nxiti reagimin e opozitës duke kritikuar Presidentin për qëndrim të njëanshëm, qoftë përmes mesazheve që dha në fjalën e tij, qoftë përmes prezencës në një situatë ku Parlamenti nuk është funksional për arsye që i dimë. Është një nga Presidentët më të dobët që kemi parë në të gjithë historinë e pluralizmit. Nuk ka pasur asnjë qëndrim të tij. Ka bërë disa vizita jashtë vendit, ku në njërën spikati se kishte marrë gjithë parukierët si këshilltarë me vete. Në një situatë krize kaq të madhe institucionale që ka bllokuar çdo mekanizëm parlamentar pritej që Presidenti të ishte një zë unifikues, pajtues. Ky është një zë që nuk dëgjohet. Nuk kemi dëgjuar që t’i kthejë qeverisë ndonjë ligj. Barriera duhet të ishte Presidenti dhe Gjykata Kushtetuese, këta nuk po shërbejnë si një digë. Ka qenë pr.ligji për studentët e mjekësisë, ku Presidenti i takoi ata, dhe në fund nuk e ktheu.
Duke folur mbi opozitën e Bashës dhe Berishës, ai shton: “Opozita e Lulzim Bashës qëndron prezentë dhe nëpërmjet votës ka votuar kundër, pjesa tjetër ka bojkotuar dhe ka kundërshtuar çdo lloj funksionimi normal të Parlamentit me akuzën ndaj mazhorancës që ka hedhur poshtë me forcën e kartonit çdo propozim të opozitës. Ka debate këtu, kush është rruga e drejtë. Por asnjë palë e opozitës s’është dakord që mazhoranca të akaparojë çdo lloj pushteti dhe përmes forcës së kartonit të bëjë si të dojë”, tha Kalemaj,
I pyetur a mund të ndikojnë ambasadorët në situatën e brendshme, Kalemaj tha:
“Unë mendoj që pesha që kanë ambasadorët në Shqipëri s’e kanë në asnjë vend europian. Në shumicën e vendeve të Ballkanit jo më Europës Perëndimore, s’e njeh njeri kush është ambasadori i SHBA apo BE. Mbi të gjitha duhet patur parasysh që ambasadori s’të sjell vota. Nuk mund të zëvendësohet në politikë, as programi elektoral, lidershipi, koherenca e deklaratave të tua, etj. etj. Nuk mjafton që të thuash që përballë kemi non gratës, edhe pse non grata ka kusuret e tij. 2008 ka qenë një nga marrëveshjet më të këqija që kanë vendosur këtë partitokraci.
Unë mendoj që PD-ja zyrtare vepron si duhet sa i përket propozimeve, që janë në rrafshin politik, por bie absolutisht kundërt, që ia kushton pjesën më të madhe të kohës duke sulmuar kampin tjetër, në vend që t’i përkushtojë energjitë e tyre luftës që duhet të bëjë çdo opozitë”.
Politologu është i mendimit që Presidenti në Shqipëri duhet të zgjidhet nga populli.
“Nuk jam dakord me modelin e Metës, por ishte një president shumë më politik se aktuali, përballë një supermazhorance. Këtij i morën edhe medaljet, dhe belbëzon aty. Unë bie dakord që Presidenti duhet të zgjidhet nga populli. Nëse Presidenti e mendon veten si noter apo rrogëtar, atëherë bie edhe ky pushtet”.
Lidhur me reformën zgjedhore, Kalemaj u shpreh pro një proporcionali kombëtar, pa herës dhe me lista të hapura.
“Z. Rama ngritën një komision ata bipartizan për reformën territoriale. Pati goxha propozime interesante nga të gjitha pjesët e opozitës, dhe në fund të ditës asgjë nuk ndodhi. Kjo salamandër elektorale i intereson partisë në pushtet. Z.Rama vetëm falë kësaj reformës territoriale i ka 4-5 deputetë, dhe 5-6 i merr nga reforma zgjedhore, dhe fakti që u përça opozita, i sjell 10 deputetë, për aq luhet në Shqipëri. Një proporcional kombëtar, me lista të hapura pa herësin famkeq të Damianit që u rrëzua nga Gjykata Kushtetuese”.
