PD kërkoi këtë të shtunë ndërhyrjen e SPAK për të zbuluar se si Mirel Mëriti, ka siguruar të dhëna nga sistemi TIMS për një prokuror të Prokurorisë së Posaçme.
Anëtari i Kryesisë së Partisë Demokratike, Belind Këlliçi solli në vëmendje se gjatë intervistës së dhënë për “SYRI TV” muajin e shkuar, Mirel Mertiri bëri publik kallëzimin që kishte depozituar pranë SPAK, ndaj prokurorit Klodian Braho. “Bashkëlidhur me kallëzimin, Mirel Mertiri kishte vendosur disa dokumente, ku më i rëndësishmi prej tyre, ishin të dhënat e sistemit TIMS, për këtë prokuror”, tha Këlliçi nga selia blu.
Në këtë pikë, ai ngre pikëpyetje se si Mërtiri, i cilësuar bosi real i inceneratorëve nga prokuroria, arriti të sigurojë të dhënat që sipas ligjit, i aksesojnë një numër i kufizuar i punonjësve të rendit.
“Vetëm ky fakt, do duhej të kishte tronditur institucionet e shtetit shqiptar, se si është e mundur që një i kërkuar ndërkombëtarisht nga drejtësia shqiptare, për vjedhjen e qindra miliona eurove nga buxheti i shtetit, kishte në posedim të dhëna sensitive për një prokuror të SPAK. Të mos harrojmë se në muajin Gusht, të vitit 2023, është bërë publik fakti se sistemi TIMS është vjedhur, pikërisht në momentin që Ministri i Brendshëm, Taulant Balla, emëroi patronazhistët e tij në krye të strukturave të Drejtorisë së Përgjithshme të Policisë së Shtetit. Pyetja që lind natyrshëm është se kush është personi që i ka dhënë shtetasit në kërkim ndërkombëtar, Mirel Mërtiri, të dhënat e sistemit TIMS. Ja ka dhënë vetë Taulant Balla apo shefi i tij në Bashkinë e Tiranës, Erion Veliaj”, tha Këlliçi.
Më tej, tha se Mërtiri po i bën shantazh prokurorit që po heton dosjen e inceneratorit të Tiranës dhe ka nën hetim vartës së Erion Veliajt.
“Partia Demokratike e Shqipërisë, vërtetë ka kritikuar dhe do vijojë të kërkojë çdo ditë hetime të plota, të pa anshme dhe efikase nga organi i akuzës, por kurrsesi nuk mund të pranojë shantazhet dhe presionet që i bëhen nga ky shtet i kriminalizuar dhe korruptuar në çdo qelizë, prokurorëve të cilët kanë në hetim dosjet që lidhen me skandalet e institucionit më të korruptuar sot në Shqipëri, Bashkisë Tiranë. Kujtojmë këtu se është pikërisht ky prokuror, i cili ka në hetim dosjen famoze 5D, të drejtorëve të korruptuar të bashkisë, me në krye Mariglen Qaton, i cili pritet të jetë shumë shpejt kurbani i rradhës, njëlloj si Taulant Tusha, për të shpëtuar lëkurën e Erion Veliajt”, tha Këlliçi.
Më tej, bën me një apel ndaj drejtuesit të SPAK Altin Dumani për hetim lidhur me vjedhjen e të dhënave nga sistemi TIMS.
“I bëjmë thirrje drejtuesit të SPAK, Altin Dumani, që në kushtet kur opozitës i është bllokuar mundësia nga Edi Rama, për ngritjen e komisionit hetimor për hetimin për vjedhjen e sistemit TIMS, të nisë menjëherë hetimet kryesisht për këtë mega skandal, duke çuar përpara drejtesisë këdo individ, që ka cënuar jo vetëm prokurorët apo qytetarët e zakonshëm, por mbi të gjitha ata individë apo zyrtarë, që kanë cenuar sigurinë tonë kombëtare dhe partneritetin tonë me aleatët strategjike”, deklaroi Këlliçi.
Ai kërkoi vendosjen e Veliajt nën përgjegjësi penale për inceneratorin e Tiranës.
