Eugen Beçi, ish-prokuror i Krimeve të Rënda, ishte edhe prokurori që mbrojti akuzën për Sokol Sinomatin, ish-anëtarin e bandës së Gaxhait në Vlorë dhe babain e Gëzim Sinomatit, 22-vjeçarit që u ekzekutua në Vlorë, një natë më parë, me snajper.
Në emisionin “Të Paekspozuarit” në MCN TV, Beçi tha se rezervohej të thoshte se vrasja e mbrëmshme e 22-vjeçarit ka lidhje me veprimtarinë e të atit.
“Bandat në qytetin e Vlorës ishin të organizuara në një si banda e Zani Çaushit dhe të Gaxhait. Pas zhvillimit të aktivitetit kriminal, me konfliktet që patën me njëra-tjetrën u ndanë. Sokol Sinomati, babai i Gëzimit të vrarë mbrëmë me snajper, ishte pjesëtar i bandës së Gaxhait dhe u dënua në nëntor 2009 dhe u dënua me 25 vjet burgim, ndërsa prokuroria kërkoi dënim të përjetshëm. Ai akuzohej për 11 vrasje, sepse çdo anëtar përgjigjet për krimet e bandës. Gjykata e Lartë më pas ia lehtësoi dënim në 16 vjet. Unë rezervohem të them nëse është i saktë motivi i hakmarrjes, apo gjakmarrjes për shkak të aktivitetit të babait të tij, apo për shkak të trafikut të lëndëve narkotike, apo veprimtari të tjera. Nga 2009 deri në 2022 nuk ka asnjë të dhënë dhe indicie se kjo ngjarje ka lidhje me ngjarjet e vitit 1997”-tha Beçi.
