Një gjykatëse në Las Vegas është sulmuar nga një kriminel gjatë një seance gjyqësore pasi ajo vendosi t’i mohojë lirimin me kusht.
Bëhet fjalë për gjyqtaren Mary Kay Holthus nga Gjykata e Qarkut Clark, e cila ishte në mes të seancës gjyqësore kur krimineli i dënuar për abuzim seksual, Deobra Delone Redden e sulmoi.
Pamjet me video tregojnë momentin e frikshëm kur Redden u hodh nga vendi ku po qëndronte dhe shkoi në stolin e gjyqtares për ta goditur. Ndërsa hidhet drejt gjyqtares së tronditur, Redden dëgjohet duke e ofenduar.
Oficeri i policisë së bashku me gjyqtaren u përpoqën të shmangnin sulmin, por ai u hodh mbi të dy dhe filloi ta rrihte brutalisht. Gjyqtarja Holthus ka pësuar lëndime si pasojë e sulmit dhe gjendja e saj po monitorohet.
Oficeri i policisë u plagos gjithashtu dhe u desh të transportohej në spital pas sulmit brutal.
