Është zbardhur dëshmia e dhënë për grupin hetimor e 51 vjeçares italiane me inicialet A.K. e cila u plagos nga një plumb qorr natën e Vitit të Ri, vetëm 35 minuta pasi ishin ndërruar vitet, në bulevardin “Zogu i I” në Tiranë.
Ajo është marrë në pyetje këtë të mërkurë nga hetuesit në Spitalin e Traumës ku po merr mjekim dhe ka deklaruar se po ecte me bashkëshortin në bulevard në momentin që diçka ka rënë nga pemët lart dhe i ka rënë në qafë. Më vonë rezultoi se bëhet fjalë për plumb i kalibrit të vogël i ardhur nga lartësia.
Grupi hetimor deri në këtë fazë akoma nuk e ka të qartë nga ka ardhur plumbi. Janë sekuestruar të gjitha pamjet e kamerave rreth e përqark zonës por akoma nuk është konstatuar ndonjë gjë e dyshimtë.
Ndërkohë, familja e shtetases italiane kërkon ndihmë për transferimin në Itali për një mjekim më të specializuar. Avokati i familjes së 51-vjeçares ka nisur një apel për autoritetet shqiptare për të lehtësuar transferimin e shpejtë nga ‘Spitali Universitar i Traumes’ në Tiranë drejt Pulias.
“Klientja ime është e vetëdijshme. Sipas mjekëve, jeta e saj është jashtë rrezikut. Kërkojmë ndërhyrje nga institucionet vendase, për shembull rajoni i Pulias, për të lejuar transferimi i gruas me ambulancë ose avion”– është shprehur avokati Leonardo Candeloro për mediat italiane.
