Asnjë efektiv policie nuk ka pranuar se ka qenë përdorues i dy aplikacioneve të përdorur nga krimi, “Sky Ecc” dhe “Encro Chat”, në formularin që plotësuan me urdhër të ministrit të Brendshëm, Taulant Balla.
Kjo gjë është konfirmuar nga Drejtori i Përgjithshëm i Policisë së Shtetit, Muhamet Rrumbullaku, në një takim informal me gazetarët për fundvit, ku është shprehur se në vlerësimin e parë rezulton se asnjë prej bluve nuk ka pranuar të ketë komunikuar përmes atyre aplikacioneve.
Formularin për “aplikacionet e krimit” e kanë plotesuar 13.500 punonjes policie, punonjes AMP-je dhe Garda e Republikes. Të gjjthë formularët do t’i nënshtrohen një analizimi të plotë në vijim.
Muajt e fundit, SPAK ka kryer arrestime të disa anëtarëve të grupeve kriminale, si edhe funksionarë policie, të cilët dyshohet se kanë kryer vepra penale pas koordinimit dhe komunikimit me mesazhe në aplikacionin “SKY-ECC”. Deri më tani, hetimet e SPAK-ut, të bazuara mbi mesazhet në ‘SKY”, të zbërthyera nga autoritetet franceze, kanë zbuluar vetëm një numër shumë të vogël punonjësish policie që kanë bashkëpunuar me grupe kriminale.
Ndërkohë, ekspertë të sigurisë dhe reporterë që mbulojnë zhvillimet në sistemin e drejtësisë, shprehen të bindur se numri i oficerëve të Policisë që kanë përdorur për qëllime kriminale këtë aplikacion është shumë më i lartë.
Nisur nga kjo premisë, duket se ministri Balla reagoi duke detyruar punonjësit e policisë që të vetëdeklarojnë nëse kanë përdorur aplikacionin “SKY”, me qëllimin sipas tij, vetëpastrimin e Policisë së Shtetit
Urdhëri dhe formulari, kishin problematika të theksuara kushtetuese, që lidhen me lirinë e individëve, por edhe ligjore, për mënyrën se si synohet të arrihet qëllimi për pastrimin e policisë.
Përdorimi i mjeteve të komunikimit, ku përfshihen edhe aplikacionet e telefonave celularë, janë një e drejtë themelore e njeriut. Sipas urdhërit të Ballës, kuptohej qartësisht se aplikacioni “SKY ECC” konsiderohet apriori si kriminal. Ndërkohë, problemi nuk qëndron tek aplikacioni, por tek mesazhet që kanë përdorur individë të caktuar nëpërmjet këtij aplikacioni. Pra, rrjedhimisht, jo çdo përdorues i këtij aplikacioni është detyrimisht i përfshirë në veprimtari kriminale.
