Nga Boldnews.al
Evis Berberi, drejtori i Autoritetit Rrugor Shqiptar, ka bërë “qokën” e radhës me tenderët e rrugëve. Pesë ditë para natës së ndërrimit të viteve, Berberi ka shpallur fituesin e një tenderi me vlerë të madhe; rruga Qafa e Buallit – Martanesh.
Fitues i këtij tenderi është shpallur një Bashkim Operatorësh Ekonomikë, të cilat ofruan 1.5 milionë euro më shumë sesa oferta më e ulët. Një “qokë” e madhe për Vitin e Ri, pasi me këtë “dorë” Berberi duhet të ketë rregulluar shumëçka, apo të ketë mbyllur portofolin e vitit 2023, me sytë nga viti 2024 se çfarë e pret.
Duket se ai është përgatitur për të gjithë skenarët, pasi vetë i zbaton me përpikmëri të gjitha udhëzimet e eprores së tij, Belinda Balluku. Megjithatë, ajo që vihet re në gjithë këtë procedurë është skualifikimi i një firme të madhe, nga ato që favorizohen në gjithë Shqipërinë.
Dhe askush nuk e ankimon, as te ARRSH-ja dhe as në Komisionin e Prokurimit Publik. Duket se gjithçka ka qenë një farsë, pasi besohet se të gjithë e dinë fituesin e një tenderi para se të hapen zarfet zyrtare, pasi ato nën dorë kanë përfunduar në momentin e bërjes së dokumenteve standarte të tenderit. Ato dokumente që kërkohen nga firmat që do fitojnë tenderin e radhës.
Dokumenti i mësipërm është njoftimi i fituesit të rrugës Qafa e Buallit – Martanesh. Fituesi është shpallur në datën 26 dhjetor 2023, pra 5 ditë para natës së Vitit të Ri. Fitues ka dalë BOE “BE – IS SH.P.K & VELLEZERIT HYSA & ERGI”.
Në dokumente thuhet se bëhet fjalë për kontratën “sistemim asfaltim rruga Qafa e Buallit – Martanesh”, me një fond limit prej 1.086.171.104 lekë pa TVSH, ose me TVSH shuma shkon në rreth 12 milionë euro. Kohëzgjatja e kontratës është 18 muaj, ndërkohë që tenderi është shpallur në datën 16 tetor 2023 për t’u shpallur fituesi vetëm disa ditë më parë.
“Me anë të këtij njoftimi ju informojmë se, në këtë procedurë kanë marrë pjesë ofertuesi ‘SALILLARI’ me vlerë 803.845.181 lekë pa TVSH. BOE ‘BE – IS SH.P.K & VELLEZERIT HYSA & ERGI’ me vlerë 947.590.308 lekë pa TVSH” thuhet në dokument.
Fitues ka dale oferta e BOE-s, e cila ka pasur një ofertë prej 1.5 milionë eurosh më shumë sesa “Salillari”. Kjo e fundit është skualifikuar pasi “oferta ekonomike e paraqitur është anomalisht e ulët”.
Por, nëse firma do ta bënte me këtë vlerë, përse nuk e lanë? Pa dashur të mbrojmë këtë oligark, i cili është denoncuar në BoldNews.al për dhjetëra procedura të dyshimta të fituara në gjithë Shqipërinë, ajo që vihet re në këtë procedurë është gadishmëria e ARRSH-së për të shpallur fitues një firmë tjetër.
Në arsyetimin e skualifikimit të Salillarit shkrihet se “ka ndërhyrë në normativat e përcaktuara në manualin e çmimeve për realizimin e zërave të punës”. Sipas tyre, në disa prej çmimeve njësi të materialeve nuk janë paraqitur oferta nga të tretë ose argumentime për prodhimin e këtyre materialeve. “Në disa analiza ka gabime aritmetike. Analizat dhe argumentimet e paraqitura nuk janë bindëse për Autoritetin Kontraktor” thuhet në dokumentet e Berberit. Pra, vetëm për këto arsye ai ka pranuar një ofertë prej 1.5 milionë eurosh më shumë, duke i shkaktuar një dëm të madh buxhetit të shtetit.
