Duke folur në edicionin e lajmeve në MCN TV mbi vendimin e Ramës për ta shkarkuar Ilir Beqajn nga grupi negociator për integrimin, analisti Andi Bushati tha se e shkuara ka treguar që shkarkon apo shmang kryeministri përfundojnë pas hekurave.
Duke iu referuar një farë mbrojtje që Rama ka treguar për Beqajn, Bushati nuk e përjashton që brenda SPAK-ut të ketë segmente të pakontrollueshme nga Rama dhe që marrin direktiva nga aleatët, por sipas tij në pikturën e madhe Prokuroria e Posaçme nuk mundet të bëjë asgjë. Sipas Bushatit, Rama është një bashkëpunëtor me ministrat e tij nën akuzë, jo “një idiot që e gënjejnë të gjithë”.
“Padyshim që tani dihet që SPAK-u në një farë mënyre merr leje nga Rama për hapat që do hedhë. Kryeministri është i informuar për veprimet e drejtësisë, ndërkohë që s’duhet të ndodhte kështu. Në rastin më të mirë të mundshëm Rama informohet përpara për veprimet e drejtësisë. Kontradikta që ngelet ende pa shpjeguar është kjo, që gjatë gjithë kohës Rama u përpoq në një farë mënyre ta mbronte Beqajn. Nëse Bllakon, Ahmetajn, Kokën, i shiti më kollaj, Beqajn u mundua ta mbronte, i dha detyrë shtetërore, e pamë përkrah Presidentit Macron kur erdhi në Tiranë. Ndërkohë që Rama përpiqej ta mbronte, SPAK-u i bën një hetim jo të zakonshëm. Hetohet për sterilizim, për Check Up-in, dhe një hetim pasuror. Në këtë kuptim na lind edhe një herë ajo pyetja: A është 100 për qind SPAK-u në zgjedhën e Ramës? Apo ka atje ndonjë celulë, ndonjë segment, i nxitur edhe nga faktorë të tjerë, shtyn ca gjëra edhe pa pëlqimin e Ramës. Unë sot s’i jap dot përgjigje, por është një dilemë që e shtyjnë shumë veta.
Nuk përjashtohet që brenda SPAK-ut të ketë segmente të pakontrollueshme, që mund të marrin direktiva nga aleatët dhe të bëjnë ndonjë aksident apo çudi për ne. Por kur hapemi në pikturën e madhe SPAK-u s’bën dot gjë. Sepse përveç SPAK-ut ka edhe shkallë gjykatash. Kurrë s’mund të flitet për drejtësi të pavarur në një regjim autokratik. Koha po tregon që ku vë dorën ka vjedhje dhe grabitje masive. Kudo që të gërmosh, ti sheh grabitje kolosale të pasurisë publike. Këtu ikim te teza që këta janë njerëz që hanë kumbulla dhe dardha pas shpinës së shefit. Kur sot gërmojmë në çdo vend dhe gjen hajdutë, mos kemi një sistem që i bën të gjithë këta njësoj hajdutë dhe të ngjashëm me njëri-tjetrin. Në të shkuarën të gjithë ata që Rama ka shkarkuar, i ka shmangur, pak muaj më vonë me lejen e tij kanë përfunduar pas hekurave. Nuk e di nëse do jetë ky rasti i Beqajt, por në të gjitha rastet e tjera ka ndodhur kështu. Rama ose është një idiot që të gjithë e gënjyekan, ose ky është bashkëpunëtor. Unë i besoj kësaj të dytës”.
Lidhur me procesin Berisha, Bushati tha se më shumë po shkohet për të ndëshkuar një njeri, duke përdorur taktikën e “armikut politik”, se sa po bëhet drejtësi. Bushati shtoi se jemi në fundin e vrasjes përfundimtare të demokracisë dhe hapjen e një periudhe autoritare.
“Padyshim që është një nga çështjet më të vështira të drejtësisë shqiptare. Problemi nuk është sa e vështirë është çështja, por sa bindëse është drejtësia në hetimin e Berishës. Këtu po vëzhgojmë ditë pas dite që me më shumë po shkohet për ta ndëshkuar këtë njeri, se sa për të bërë drejtësi me këtë njeri. Berisha nuk po trajtohet si njeri ndaj të cilit duhet bërë drejtësi, edhe duke e dënuar, por po përdoret një taktikë e armikut politik për ta ndëshkuar. Procesi i Berishës ngjan shumë me procesin ndaj Fatos Nanos, të dënuar nga Berisha, duke përdorur disa gjyqtarë dhe prokurorë të dalë nga plepat. Bindja ime është që jemi në të njëjtën situatë. Berisha po dënohet nga prokurorë dhe gjyqtarë që po veprojnë si kamikazë politikë. E ardhmja e PD do jetë e ngjashme me të ardhmen e çdo njeriu që është kritik apo kundërshtar i Ramës. Ne po kalojmë nga demokracia hibride në autokraci. Jemi në fundin e një epoke. Jemi në fundin e vrasjes përfundimtare të demokracisë dhe hapjen e një periudhe autoritare”.
